#Кыскача яңалыклар 05 август 2026, 15:41

Күзгә күренми торган куркыныч: иерсиниозның билгеләре нинди?

05 август 2026, 15:41

Татарстанда яшәүчеләргә иерсиниоз исемле куркыныч эчәк инфекциясенең билгеләре һәм аннан саклану юллары турында искә төшерделәр.

Скопировать ссылку

Бу хакта Татарстан буенча Роспотребнадзор идарәсе хәбәр итә.

Белгечләр аңлатуынча, иерсиниоз – фекаль-ораль юл белән йога торган инфекция. Аның үзенчәлеге шунда: авыруны китереп чыгаручы бактерияләр туфракта, суда һәм азык-төлек продуктларында озак вакыт саклана, хәтта суыткычта да үрчүен дәвам итә ала.

Инфекциянең төп чыганагы – авыру хайваннар һәм кимерүчеләр. Күпчелек очракта кешеләр чирне җитәрлек пешерелмәгән ит һәм сөт продуктлары, шулай ук пычрак яшелчә һәм җиләк-җимеш аша йоктыра.

Авыруның инкубация чоры берничә сәгатьтән өч атнага кадәр дәвам итә, әмма ешрак ул 2–3 көн тәшкил итә. Иерсиниоз гадәттә кинәт башлана: тән температурасы күтәрелә, хәлсезлек барлыкка килә, эч авырта, эч китә, кайбер очракларда тиредә тимгелләр дә пәйда булырга мөмкин.

Чирдән саклану өчен Роспотребнадзор түбәндәге кагыйдәләрне үтәргә киңәш итә:

яшелчә һәм җиләк-җимешләрне яхшылап юарга;

ит һәм сөт ризыкларын тиешенчә термик эшкәртергә;

кайнатылган яки шешәдәге суны гына эчәргә;

чи һәм әзер продуктларны аерым сакларга;

ризык әзерләгәндә шәхси гигиена кагыйдәләрен үтәргә.