Лениногорск районында «Татар аты» фестивале 100дән артык катнашучыны җыйды

Фестивальгә Татарстаннан тыш Мәскәү, Чиләбе һәм Владимир өлкәләреннән, Башкортстаннан, шулай ук Казахстан һәм Чилидан кунаклар килгән. Оештыручылар билгеләп үткәнчә, быел фестиваль халыкара дәрәҗәгә чыккан.

Лениногорск районы башлыгы Марат Гыйрфанов чараны оештыручыларга — «Алмакай» ат ишегалдына нигез салучы Фәрит Нәбиуллинга һәм Татарстан Дәүләт Советы депутаты Рәгать Хөсәеновка рәхмәт белдерде. Аның сүзләренчә, фестиваль татар халкының традицияләрен саклауга һәм үстерүгә зур өлеш кертә.

Чара кысаларында милли ат ярышлары уздырылды. Катнашучылар «Аударыш», «Улак-Кук бүре», «Тай тулак» һәм «Тәңкә алу» бәйгеләрендә көч сынашты. Кунаклар шулай ук атта уктан ату һәм классик чабышларны тамаша кылды.

Быел фестиваль программасына иҗади юнәлеш тә өстәлгән. Ачык һавада узган Бөтенроссия пленэрында катнашкан рәссамнарның эшләре күргәзмәсе оештырылды. Картиналар табигать кочагында, печән кибәннәре янәшәсендә урнаштырылган.

«Татар аты» фестивале татар халкының милли ат спортын, атчылык традицияләрен һәм мәдәни мирасын популярлаштыру мәйданчыгына әверелә.