Марат Җәббаров шәхси ярдәмче хуҗалыкларга ярдәм чаралары турында сөйләде

Узган ел шәхси ярдәмче хуҗалыклар 449 млн сум алган. Бу хакта Татарстан авыл хуҗалыгы һәм азык-төлек министры Марат Җәббаров Чистай районында авыл халкының эшлекле активлыгын арттыру мәсьәләләре буенча зона киңәшмәсендә сөйләде.

«Ярдәмгә карамастан, электрон хуҗалык кенәгәсе мәгълүматларына караганда, 2024 елда шәхси ярдәмче хуҗалыкларда мөгезле эре терлекләр саны 33 мең башка, шул исәптән 8,8 мең сыерга кимегән», – дип Җәббаровның сүзләрен китерә Татарстан Авыл хуҗалыгы һәм азык-төлек министрлыгы матбугат хезмәте.

Шуңа бәйле рәвештә Татарстан Рәисе Рөстәм Миңнеханов савым сыерларын тоту өчен өстәмә рәвештә 184 млн сум бүлеп бирде. Шул рәвешле, бу юнәлеш буенча ярдәм 534 млн сумга кадәр арткан. Бер сыерга субсидияләр 6,3 мең сумга кадәр арткан.

Моннан тыш, таналар һәм бер мәртәбә бозаулаган сыерлар сатып алуга субсидияләр 60 мең сумнан 80 мең сумга кадәр, нәселле сыерлар сатып алуга – 70 мең сумнан 90 мең сумга кадәр арттырылды.

Кече фермалар төзүгә субсидия күләме биш яки аннан күбрәкне алганда 300 меңнән 500 мең сумга кадәр, сигез яки аннан күбрәк сыер алу өчен 600 меңнән 1 млн сумга кадәр артты.

Узган ел шәхси ярдәмче хуҗалыкларда 106,7 млрд сумлык авыл хуҗалыгы продукциясе җитештерелгән, бу гомумреспублика күләменең 31процентын тәшкил итә.

Татарстанда агросәнәгать комплексын ныгыту өчен «Азык-төлек иминлеген технологик тәэмин итү» илкүләм проекты гамәлгә ашырыла.

Чыганак: Татар-информ