Пенсия тупланмаларын алу өчен ярты ел эчендә гариза бирергә кирәк

Аның сүзләренчә, пенсия тупланмалары гадәти мирас составына керми. Алар махсус кагыйдәләр нигезендә хокук варисларына түләнә.

– Әгәр кеше исән вакытта пенсия тупланмаларын кемгә һәм нинди өлешләрдә бирергә кирәклеген күрсәтеп гариза калдырган булса, акча шул кешеләргә күчерелә. Мондый күрсәтмә булмаса, беренче чиратта үлгән кешенең балалары, тормыш иптәше һәм әти-әнисе хокук варислары булып санала. Алар булмаган очракта икенче чираттагы туганнар – абый-сеңелләр, әби-бабайлар һәм оныклар акча алырга хокуклы, – дип аңлаттты безгә адвокат.

Гаризаны кеше вафат булганнан соң алты ай эчендә «Госуслуги» порталы, Россия Социаль фонды (СФР) бүлекчәсе яки дәүләтнеке булмаган пенсия фонды (НПФ) аша тапшырырга кирәк.

Әгәр әлеге вакыт үткәреп җибәрелгән икән, аны суд аша гына торгызырга мөмкин.

Адвокат билгеләп үткәнчә, пенсия тупланмаларын түләү турында карар, кагыйдә буларак, кеше вафат булганнан соң җиденче айда кабул ителә, ә акча аннан соң банк счетына яки почта аша күчерелә.