Путин балтырганга каршы көрәш турындагы канунга кул куйган. Нәрсә белергә кирәк?

Россия Президенты Владимир Путин җир кишәрлекләре хуҗаларын борщевик һәм башка зарарлы үсемлекләрнең төрләре белән көрәшергә мәҗбүр итүче канунга кул куйдган. Документ хокукый мәгълүмат порталында бастырылган.

Әгәр милекченең җир кишәрлегендә куркыныч дип табылган үсемлек үсентеләре табылса, ул аны юкка чыгару турында күрсәтмә ала. Карарны игътибарсыз калдырган очракта хуҗага административ җаваплылык яный.
Хөкүмәт инвазивлыкның (куркыныч/чит – ред) гомуми критерийларын раслаячак, ә төбәкләр ботаниклар һәм галим-географлар киңәшләре нигезендә үз исемлеген формалаштырачак, дип билгеләп үтә "Парламентская газета".

Балтырганны (борщевик, лат. Heracléum) яфраклары яшь, сабагы 20-40 сантиметр чагында, биткә-кулга тимәсен өчен махсус кием киеп, чабып алырга, тамырын казып өзәргә була. Бу очракта ул орлык бирә алмый калачак. Авыл хуҗалыгы җирләре булып саналмаган мәйданнарда тоташ тәэсир итүче гербицидлар кулланырга мөмкин.

Селектив препаратларны кыяклы үләннәр чәчү белән куллану максатка ярашлы, алар чүп үләненең үсешен тоткарлый. Җиңел чәчәкләре сәбәпле, орлыклары, җил искәндә, ерак очып китә, ләкин ул даими рәвештә эш алып бара торган кырларда үсми, ә менә елгалар һәм ташландык күләгәле җирләр–алар өчен уңдырышлы урын. Чәчү әйләнешеннән чыгарылган авыл хуҗалыгы билгеләнешендәге мәйданнарны сөреп, дисклап, бәрәңге, кузаклы культуралар утырту нәтиҗәле.

Балтырганны топинамбур үләне кысрыклап чыгара ала. Июль-август айларында чәчәк атучы балтырган бүлеп чыгарган серкәле тузан һавага таралып, тын юлларын да зарарларга сәләтле. Тирегә эләккән очракта тәнне пешерә. Еш кына пешү очраклары балаларда очрый. Шуңа күрә аларга балтырганның зыяны турында аңлату мөһим!