Россия мәктәпләрендә инде көздән үк тәртип өчен билге куюны кертергә мөмкиннәр

Үз-үзен тоту өчен билге кую Россия мәктәпләрендә инде яңа уку елыннан ук сынау режимында барлыкка килергә мөмкин, дип хәбәр иткән РИА Новостига Россия мәгариф министры Сергей Кравцов.

"Мөмкин. Мин моның сынау режимында булачагын да кире какмыйм", - дип билгеләп үткән ул.
Министр шулай ук белдергәнчә, хәзерге вакытта бу мәсьәлә министрлык тарафыннан тикшерелә.
"Бу карарны артык кичектереп тормыйбыз. Бу, чыннан да, файдага булсын өчен, барлык механизмнарны да эшләргә кирәк, менә бу бик мөһим", — дип өстәгән министр.

Элегрәк Сахалин өлкәсе иҗтимагый палатасы рәисе, гражданлык җәмгыятен үстерү һәм кеше хокуклары буенча совет әгъзасы Владимир Иконников мәктәпләргә тәртип өчен бәяләүне кайтарырга тәкъдим итте, аның критерийларын Россия мәгариф академиясе билгели алыр иде. Россия Президенты Владимир Путин Министрлар Кабинетына мондый бәяләүне кертүнең максатка ярашлылыгы турында фикер алышырга кушты. Моннан тыш, дәүләт башлыгы уңай карар булган очракта, тәртип өчен билге башкаларга тигез булырга тиеш, дип билгеләп үтте.

Россия мәгариф академиясе башлыгы Ольга Васильева, үз чиратында белдергәнчә, тәртип буенча билге кертү турында киң иҗтимагый фикер алышулардан соң гына сөйләргә мөмкин, әмма мондый билге кую системасы элегрәк илдә булган.

1943 елда укучының нинди кыяфәттә булырга, укырга, укытучылар белән аралашырга, дәресләрдә һәм тәнәфесләрдә үзен тотарга тиешлеген билгеләүче "укучылар өчен кагыйдәләр" расланган. Бишле "укучының шелтәсез тәртибе өчен" куелган, өчле — "үз-үзен тотышының җитди бозылуы өчен", икеле мәктәптән чыгару мәсьәләсен хәл иткәндә куелган.