Россиядә Хэллоуинга алмашка рус әкиятләре бәйрәме тәкъдим иттеләр

Анда балалар куркыныч персонажлар булып киенеп, конкурсларда һәм күңелле уеннарда катнаша алачак. Бу тәкъдим белән Россия Иҗтимагый палатасы секретаре урынбасары Владислав Гриб чыгыш ясаган, дип хәбәр итә ТАСС.

Владислав Гриб үзе Хэллоуин бәйрәмен өнәп бетермәвен әйткән. Шул ук вакытта балаларның төрле костюмнар кияргә, конкурсларда катнашырга һәм күңел ачарга яратуын билгеләп үткән.

«Хэллоуинга милли төсмер бирергә һәм аны рус әкиятләре бәйрәме дип атарга кирәк», — дигән ул.

Гриб фикеренчә, Россия фольклорында мондый бәйрәм өчен кызыклы һәм хәтта бераз куркыныч геройлар да җитәрлек. Алар арасында Кощей Бессмертный, Убырлы карчык, Урман иясе һәм Су иясе бар.

Иҗтимагый палата вәкиле мондый бәйрәм балаларга кечкенәдән таныш әкиятләр дөньясына кайтырга мөмкинлек бирәчәк, шулай ук милли мәдәнияткә һәм халык мирасына хөрмәт күрсәтүнең бер ысулы булачак дип саный.

Әлегә бу — тәкъдим генә. Рус әкиятләре бәйрәменең үткәрелү вакыты һәм аны оештыру тәртибе турында мәгълүмат юк.