Рөстәм Миңнеханов Әлмәттә Р. Фәхретдин исемендәге ислам мәдрәсәсенең яңартылган бинасын карады

Элегрәк нефть чыгару компанияләренең берсенә караган бина тулысынча реконструкцияләнгән. Төзелеш-монтаж эшләре агымдагы елның апрель аенда башланып, 31 октябрьдә төгәлләнгән. Яңартылган мәдрәсә Әлмәт шәһәренең Мәрҗани урамындагы архитектура ансамбленең гармонияле өлешенә әверелгән.

Бина барлык белем бирү стандартларына җавап бирә торган, заманча һәм уңайлы итеп җиһазландырылган. Биредә укыту өчен кирәкле барлык шартлар тудырылган, шул исәптән торак блогы да бар. Мәдрәсә 48 шәкертне урнаштыру мөмкинлегенә ия.

Әлмәт мәдрәсәсе Россиядә үз юнәлешендә алдынгы уку йортларының берсе санала. Бүгенге көндә биредә 550гә якын кеше белем ала, шул исәптән көндезге бүлектә 150 студент һәм хатын-кызлар бүлегендә 94 студент кыз. Укучылар географиясе киң – Идел буе төбәкләре белән беррәттән Үзәк Россия, Урал һәм Себердән дә студентлар бар.

Рөстәм Миңнеханов һәм аны озата йөрүчеләр бинаның уку сыйныфларын, компьютер классын, спорт залын, медицина кабинетын, шулай ук торак блокларны карады. Татарстан Рәисе үткәрелгән реконструкциягә, шәкертләрнең уку һәм яшәү шартларына уңай бәя бирде.

Шулай ук ул шәкертләр белән аралашты, аерым алганда, аларның татар телен белүе белән кызыксынды. Мәдрәсә вәкилләре хәбәр иткәнчә, укучыларның 80 проценты татар телен белә, калганнары, нигездә, башка төбәкләрдән килгән студентлар, тел белемен камилләштерә. Р. Фәхретдин исемендәге ислам мәдрәсәсендә шулай ук гарәп һәм инглиз телләре дә укытыла.