Рөстәм Миңнеханов Казанның Тынычлык бистәсендә Сабан туен ачты

Казанның Тынычлык бистәсендә Сабан туе башланды. Шәһәр халкы һәм кунаклар өчен Татарстанның 11 районы муниципалитетларның традицияләре һәм символлары турында сөйли торган тематик утарлар әзерләгән. Аларны бәйрәмнең хөрмәтле кунаклары (РФ вице-премьеры Марат Хөснуллин, Татарстан Рәисе Рөстәм Миңнеханов, «Гадел Россия – Дөреслек өчен» партиясе рәисе Сергей Миронов, Казан мэры Илсур Метшин һ.б.) да карады.

Аннары мәйданда масштаблы тамаша башланды, анда җыр-биюләр аша Сабантуй бәйрәме һәм традицион уеннарның тарихы турында сөйләделәр.

«Бүген бик матур бәйрәм уза. Без авыл хезмәтчәннәрен, җитештерү алдынгыларын, 50 ел бергә яшәүче гаиләләрне, аксакалларны, махсус хәрби операциядә катнашучыларның хатыннарын чакырдык. Әйдәгез, аларны аерым алкышлыйк. Теләк бер генә – җиңү», - дип мөрәҗәгать итте Рөстәм Миңнеханов трибунадан тамашачыларга.

Бу көнне авыл халкына рәхмәт әйтергә кирәк, аларның тырышлыгы белән табыннардан ипи өзелми, дип өстәде Казан мэры Илсур Метшин.

«Сабан туе – һәркемнең яраткан һәм көтеп алган бәйрәме. Авыл халкына табыннарыбызда һәрвакыт ипи булганы өчен рәхмәт әйтәсе килә. Бүген алар бирегә килеп, Казанда Сабан туе уза торган өч мәйданчыкны да бизәде», - дип белдерде шәһәр башлыгы.

Зур тамашадан соң көрәш ярышлары башланды, анда Сабан туеның баш батыры ачыкланачак, ә күмәк күңел ачу һәм халык уеннары кичкә кадәр дәвам итәчәк.

Чыганак: Татар-информ