#Кыскача яңалыклар 27 май 2025, 14:59

Шәйхразиев дөнья буйлап күпме Сабантуй узганын әйтте

27 май 2025, 14:59

Дөньяда ел саен 4 меңгә якын Сабантуй оештырыла. Россия Федерациясенең 62 төбәгендә – 296, ә 38 илдә 104 Сабантуй уздырыла. Татарстан республикадан читтәге 400 Сабан туен үткәрергә булыша.

Скопировать ссылку

Хөкүмәт йортындагы брифингта Сабан туйларына кагылышлы саннарны Татарстан Премьер-министры урынбасары Васыйл Шәйхразиев әйтте.
– Татарстанда 175 милләтне һәм халыкны туплаган 4 миллионнан артык кеше яши. Халыкара форумнарга килгән делегатлар, туристлар Татарстанның үсешенә соклануын белдерә. Кечкенә авыллардан башлап, зур шәһәрләргә кадәр үсештә. Үсеш булсын өчен гаиләдә тынычлык, күршеләр белән дуслыкта яшәү зарур. Республикабызда ислам белән православие диннәре һәм милләтләр арасында татулык хөкем сөрә, милли мәдәниятләрнең үсешенә ярдәм күрсәтелә. Татарстан Рәисе Рөстәм Миңнеханов, шулай ук Татарстандагы халыклар ассамблеясы рәисе Фәрит Мөхәммәтшин милләтара дуслыкны саклауны һәм ныгытуны төп бурычларның берсе итеп куя. Татарстан Рәисе Рөстәм Миңнеханов җыр-музыка өлешен кыскартып, Сабан туйларында борынгыдан килгән уен-бәйгеләргә күбрәк игътибар бирергә чакырды. Җырчы түгел, ә татар һәм башкорт уен-бәйгеләре Сабан туеның түрендә булырга тиеш, – диде Васыйл Шәйхразиев.

Хәбәр иткәнебезчә, Татарстан Рәисе Рөстәм Миңнеханов указы нигезендә республикада 2025 елның 7-8 июньнәрендә авылларда һәм районнарда, 14 июньдә – Чаллыда, 21 июньдә Казанда татар халкының милли бәйрәме – Сабантуй үткәрелә.

Кызыклы яңалыкларны күзәтеп бару өчен безнең МАХ каналына кушылыгыз.

#Миңнеханов