Сак булыгыз! Ике көн эчендә газ белән бәйле биш җитди очрак

Республиканың Дәүләт торак инспекциясе хәбәр иткәнчә, оператив хезмәтләр чакырулар буенча биш тапкыр чыккан.

Иң фаҗигале вакыйга Әгерҗе районында булган. Бима авылында Нагорная урамында шәхси йортта 1949 елгы хатын-кыз һәм 1968 елгы ир-атның гәүдәләре табылган. Ана һәм улының үлем сәбәпләре ачыклана. Фаҗигадән соң газчылар төтен торбасының кузгатылганын ачыклаганнар.

Калган очраклар Казанда булган:

Бертуган Касыймовлар урамындагы 64 нче йортта төтен торбасы эшләмәве аркасында 2001 елгы егет һәм 2004 елгы кыз хастаханәгә озатылган. 
Мусин урамындагы 49а номерлы йортта төтен торбасының төзек булмавы аркасында газны сүндергәннәр;
Чкалов урамындагы 10 нчы йортта газүткәргечтә газ чыгып тору аркасында берничә фатирда газны сүндергәннәр;
Олег Кошевой урамындагы 14 нче йортта бер ир кеше аркасында газүткәргечне су баскан. Аңа зыянны каплау һәм штраф яный.
Барлык йортларда да газ белән тәэмин итү тәртип бозуларны бетергәннән һәм тикшерүләрдән соң торгызылачак. Инспекция һәр очракның шартларын ачыклый һәм идарәче компанияләр, газ хезмәте үз вазыйфаларын ничек башкарганнарын тикшерә.