Сеңлесе пычак белән кадаган үсмер малайны Үзбәкстанда җирләячәкләр

Дүртенче сыйныфта укучы 11 яшьлек кыз үзенең 13 яшьлек абыйсына пычак белән кадауда шикләнелә, дип хәбәр ителә. Моннан тыш, 
балаларның әбиләре дә зыян күргән. Ул Чаллыдагы Ашыгыч медицина ярдәме хастаханәсенең реанимациясендә дәвалана.

Шулай ук җинаятьтә шикләнелүче кыз 19 яшьлек апасын буарга тырышкан, ләкин тегесе кача алган һәм ярдәм чакырткан. Һәлак булган малайның гәүдәсе моргта ята, әти-әнисе улын Үзбәкстанда җирләргә карар кылган. Хәзерге вакытта гәүдәне транспортлау өчен барлык кирәкле документларны рәсмиләштерәләр. 

Гаилә имин дип бәяләнә, социаль хезмәтләр учетында тормаган. Әнисе канлы вакыйга булган төнне «Чаллы-Бройлер» предприятиесендә эшләгән, әтисе бу вакытта башка төбәктә командировкада булган. Тикшерүләрнең беренчел мәгълүматлары низаг малайның сеңлесенә телефонда озак вакыт уйнавы турында кисәтүе аркасында килеп чыккан дип күрсәтә.

Шикләнелүче кызны Казанның психиатрия учреждениесенә китергәннәр, анда аның психик халәтен билгеләү өчен тиешле экспертизалар билгеләнгән. Мәктәп укытучысы һәм сыйныфташлары малайны уңай бәялиләр: ул яхшы билгеләргә укыган һәм яшьтәшләре арасында ихтирам казанган. 

Татарстанның бала хокуклары буенча вәкаләтле вәкиле Ирина Волынец хәбәр иткәнчә, вәзгыять контрольдә тотыла, инцидент шартлары тикшерелә, аның нәтиҗәләре буенча тиешле чаралар күреләчәк.