Татарстан авылларында яшәүчеләр өй интернетына тоташтырган өчен тавыш бирә ала

Аерым йортлар өчен инфраструктура төзелешенә акчалар универсаль хезмәт күрсәтү резервыннан бүлеп биреләчәк, дип хәбәр итә ТР Дәүләт идарәсен цифрлы нигездә үстерү, мәгълүмати технологияләр һәм элемтә министрлыгы матбугат хезмәте.

Универсаль хезмәт күрсәтү резервы - федераль бюджетта Россия элемтә операторлары кеременең бер өлешен күчерү хисабына формалаша торган фонд ул. Бүген резерв акчалары база станцияләре, торак пунктларга кадәр җепселле-оптик элемтә линияләре төзү һәм башка максатларга юнәлдерелә.

Сораштыруда федераль проектлар кысаларында дәүләт тарафыннан элемтә инфраструктурасы булдырылган, халкы 100дән 1000гә кадәр тәшкил иткән авыллар катнаша ала. Мәсәлән, мәктәпләр, хастаханәләр интернетка тоташтырылган яки мобиль элемтә база станцияләре төзелгән торак пунктлар.

Сораштыруны 2026 елның 30 мартына кадәр түбәндәге ике сылтаманың берсе буенча узарга мөмкин:

. https://pos.gosuslugi.ru/lkp/polls/583426/

. https://pos.gosuslugi.ru/lkp/polls/568138/

Тавыш бирүдә катнашу өчен «Дәүләт хезмәтләре» порталы аша авторизация узарга кирәк. Кулланучы яшәгән төбәген һәм үз йортының төгәл адресын күрсәтергә тиеш. Сораштыру аноним, аның нәтиҗәләре статистика рәвешендә аерым кешегә беркетелмәгән формада тәкъдим ителәчәк.

Катнашучылар йортны интернетка тоташтыру өчен бер тапкыр бирелә торган теркәлгән түләү кертергә кирәклеген исәпкә алырга тиеш. Шуннан соң интернет өчен ай саен түләргә кирәк булачак.

Программа «Мәгълүматлар икътисады һәм дәүләтнең цифрлы трансформациясе» илкүләм проектына ярдәм йөзеннән гамәлгә ашырыла. 2021 елдан башлап тавыш бирү нәтиҗәләре буенча 6 700дән артык торак пункт мобиль интернетка тоташтырылган. 2026 елның 25 декабренә кадәр тагын 100 торак пункт киң полосалы интернет белән тәэмин ителәчәк.

Тулырак: https://tatar-inform.tatar/news/ziteli-sel-tatarstana-mogut-progolosovat-za-podklyucenie-k-domasnemu-internetu-5920727