Татарстан бәрәңге җыю буенча Россиядә лидер булды: уңышның 80 процентын халык үстергән

Бу — 846 мең тонна уңыш дигән сүз. Күрсәткеч буенча республика Россия төбәкләре арасында беренче урынга чыккан.

Тикшеренүләр мәгълүматларына караганда, Россия буенча бәрәңге уңышының уртача 57 проценты шәхси ярдәмче хуҗалыклар, дача кишәрлекләре һәм яшелчә бакчалары хисабына туры килә. Калган өлешен авыл хуҗалыгы оешмалары һәм фермерлар үстерә.

Татарстан шәхси хуҗалыкларында бәрәңге уңышы күләме белән генә түгел, уңдырышлылыгы белән дә аерылып тора. Биредә уртача бер сутыйдан 230 килограмм чамасы бәрәңге җыеп алалар. Россия буенча бу күрсәткеч якынча 155 килограмм тәшкил итә.

Шул ук вакытта шәхси участокларда бәрәңге үстерүчеләр саны елдан-ел кими бара. 2016–2021 елларда Россиядә шәхси ярдәмче хуҗалыкларда бәрәңге өчен файдаланыла торган мәйданнар өчтән бергә якын кимегән.

Белгечләр моны берничә сәбәп белән бәйли: кайберәүләр бәрәңгене кибеттән сатып алуны өстен күрә, өлкән яшьтәге кешеләргә бакчада эшләү авырлаша, ә яшьләрнең яшелчә үстерүгә кызыксынуы түбән.

Россиядә авыл җирләрендә 16,2 миллион шәхси ярдәмче хуҗалык исәпләнә. Алар биләгән гомуми мәйдан 9,8 миллион гектар тәшкил итә. Моннан тыш, коммерцияле булмаган ширкәтләрдәге дача кишәрлекләре якынча 1,1 миллион гектар мәйданны били.

Шәхси хуҗалыклар һәм дачачылар илдәге барлык бәрәңгенең яртысыннан күбрәген, яшелчәләрнең яртысына якынын һәм җиләкләрнең зур өлешен үстерә.