Татарстан Идел буенда хезмәт хакы буенча лидер: май аенда уртача хезмәт хакы 104,8 мең сумга җиткән

Росстатның яңартылган мәгълүматларына караганда, 2026 елның маенда республикада уртача айлык номиналь хезмәт хакы 104,8 мең сум тәшкил иткән.

Гыйнвар–май айлары нәтиҗәләре буенча да Татарстан беренче урынны саклап калган. Бу чорда уртача хезмәт хакы 97,3 мең сум булган. Икенче урында – Пермь крае (88,2 мең сум), өченчедә – Удмуртия (85,4 мең сум), аннары Түбән Новгород өлкәсе (84,8 мең сум) килә.

Шул ук вакытта Россия буенча уртача хезмәт хакы 2026 елның гыйнвар–май айларында 108,1 мең сум тәшкил иткән.

Республикада хезмәт базары да тотрыклы булып кала. 2026 елның апрель–июнь айларында Татарстанда 2,05 миллион кеше эш белән мәшгуль булган, ә мәшгульлек дәрәҗәсе 62 процентка җиткән. Бу күрсәткеч буенча республика Идел буе федераль округының иң яхшы өч төбәге арасына кергән.

Эшсезлек дәрәҗәсе дә түбән булып саклана. Эшче көчләрне тикшерү методологиясе буенча ул Татарстанда 1,7 процент тәшкил иткән. Ә мәшгульлек хезмәтләрендә рәсми теркәлгән эшсезлек дәрәҗәсе нибары 0,2 процент булган, бу – округтагы иң яхшы күрсәткечләрнең берсе.

Шул ук вакытта республикада хезмәткәрләргә ихтыяҗ югары булып кала. 2026 елның июнь ахырына эш бирүчеләр мәшгульлек хезмәтләренә 84,2 мең вакансия турында хәбәр иткән. Бу күрсәткеч буенча да Татарстан Идел буе федераль округында беренче урында. Чагыштыру өчен, Башкортстанда – 29,5 мең, Самара өлкәсендә – 37,4 мең, Пермь краенда 31 мең вакансия теркәлгән.