Татарстан мәчетләрендә Түбән Камадагы һөҗүм корбаннары өчен дога кылдылар

Татарстанда фаҗига сәбәпле матәм игълан ителде. Туганнарын һәм якыннарын югалткан гаиләләргә рухи таяныч күрсәтү максатыннан, мәчетләрдә өйлә намазы вакытында җәмәгать белән дога укылды. Имамнар һәм мәхәллә халкы Коръән аятьләрен укып, һәлак булучыларга Аллаһы Тәгаләнең рәхмәтен, аларның якыннарына сабырлык һәм ныклык, зыян күрүчеләргә тизрәк савыгу теләде.

Казанның Галиев мәчетендә имам-хатыйб Рамил хәзрәт Мингәрәев Татарстан мөселманнарының бу авыр көннәрдә Түбән Кама халкының кайгысын уртаклашуын билгеләп үтте.

«Я Раббым Аллаһ! Зур югалту, авыр кайгы-хәсрәт кичерүчеләрне һәм үз туганнарының гомерен саклап калу турында сораучыларның догаларын кире какма, ярдәмеңнән ташлама. Җир йөзендә тынычлык урнаштыр, Ватаныбызны дошманнардан, бәла-казалардан, бәхетсезлекләрдән сакла, иминлектән аерма. Мәрхүмнәрнең рухлары шат булсын. Иннә лиЛләһи үә иннә иләйһи раҗигун», — дип дога кылды ул.

Татарстан мөфтие Камил хәзрәт Сәмигуллин да кайгы уртаклашу сүзләрен җиткерде.

«Татарстан Республикасы мөселманнары Диния нәзарәте һәм шәхсән үз исемемнән Түбән Камада коточкыч һөҗүм нәтиҗәсендә якыннарын югалткан гаиләләрнең, шулай ук зыян күрүчеләрнең кайгысын уртаклашам. Хөрмәтле түбәнкамалылар, бу хәсрәтне республика мөселманнары сезнең белән бергә кичерә. Без бу вакыйгаларның гөнаһсыз корбаннары — туганнарыгызны һәм якыннарыгызны югалту ачысын уртаклашабыз», — диде мөфти.

Камил хәзрәт Сәмигуллин мәрхүмнәргә Аллаһы Тәгаләнең рәхмәтен, аларның якыннарына көч һәм сабырлык, җәрәхәтләнгән кешеләргә тизрәк савыгу теләде.

«Йә Рабби, җир йөзендә тынычлык урнаштыр!» — дип тәмамлады ул үзенең мөрәҗәгатен.