Татарстан Мәгариф һәм фән министрлыгы милли мәктәпләрдә уку планын саклауны сорый

ТР мәгариф һәм фән министры Илсур Һадиуллин ТР Дәүләт Советының 11нче утырышында шул хакта хәбәр итте.

«Сез беләсезме, уку планының беренче һәм икенче вариантларында телләр юк – безнең республикада беренче һәм икенче вариант гомумән беркайчан да булмады. Өченче, дүртенче, бишенче вариант бер сәгатькә кыскартыла. Балаларга гомуми максималь йөкләнешне арттырмыйча, уртак тел табарбыз дип уйлыйм, чөнки бүген департамент, министрлык белән бу юнәлештә эш алып барыла. Башлангыч мәктәпнең уку планнарында ике сәгать туган тел һәм әдәбият, ә анда үзгәрешләр күп», - диде ул.

РФ Мәгариф министрлыгы башлангыч һәм төп гомуми белем бирүнең федераль дәүләт белем бирү стандартларындагы үзгәрешләр белән бәйле боерык әзерләде. Ул быелның 1 сентябреннән үз көченә керә, дип искәртте Һадиуллин.

Аның сүзләренчә, кайбер үзгәрешләр барыннан да элек беренче сыйныфларга кагыла. «Хәзер без бу юнәлешне өйрәнәбез», - диде ул.

Мәгариф һәм фән министры билгеләп үткәнчә, үзгәрешләр барыннан да бигрәк эчтәлеккә кагыла. «Без күпме еллар толерантлык, түземлелек турында сөйләштек. Без - руслар, чувашлар, марилар, яһүдләр, татарлар - барыбыз да бергә яшибез. Бу төшенчәне гомумән алып ташладылар, ул юк», - дип искәртте министр.

Һадиуллин утырышта мәгарифне үстерү программаларын гамәлгә ашыруның барышы турында доклад белән чыгыш ясады. Аның докладыннан соң депутатлар карар кабул итте.

«Парламент карарында министрлыкка ТР мәгарифен үстерү, ТР дәүләт телләрен һәм республикадагы башка телләрне саклау, өйрәнү һәм үстерү буенча дәүләт программаларын гамәлгә ашыруны дәвам итәргә тәкъдим итәргә диелә. РФ Президенты киңәшчесе Елена Ямпольская инициативасы буенча телләргә кагылышлы кайбер карарларга бәйле рәвештә, сез бу пунктны ничек үтәячәксез?» – дип кызыксынды ТР Дәүләт Советы Рәисе Фәрит Мөхәммәтшин.

Чыганак: Татар-информ