Татарстанда авылга күченгән спорт хезмәткәрләренә миллион сум түләргә планлаштыралар

Тиешле проект коррупциягә каршы экспертиза уза.

Программаны авыл торак пунктларына, эшчеләр поселокларына, шәһәр тибындагы поселокларга һәм 50 меңгә кадәр халкы булган шәһәрләргә җәелдерергә планлаштыралар. Түләүне алу өчен кандидатларның Россия гражданлыгы, югары яисә урта һөнәри белеме булырга һәм агымдагы елның 1 сентябренә кадәр җирле спорт оешмасы белән хезмәт килешүе төзергә тиеш.

Татарстан спорт министрлыгы һәм муниципаль берәмлек белән өч яклы килешү төзү мәҗбүри шарт булып тора. Аның нигезендә белгеч сайланган оешмада кимендә биш ел эшләргә тиеш. Хезмәт килешүе вакытыннан алда өзелгән очракта түләүне тулысынча яки өлешчә кайтарырга кирәк булачак.

Программаны гамәлгә ашыру өчен җаваплы итеп ТР Спорт министрлыгы билгеләнәчәк, ул вакантлы вазыйфалар исемлеген раслаячак һәм түләүләр бирү турында карарлар кабул итәчәк. Финанслау федераль һәм республика бюджетлары хисабына башкарылачак.

2026 елдан Татарстан «Земский тренер» программасында катнашачак төбәкләр санына кергән. Бу РФ спорт министры Михаил Дегтяревның яңа проекты, ул мәгариф һәм сәламәтлек саклау өлкәсендәге хезмәттәшләре үрнәгендә барырга карар кылган. Беренче тапкыр ул аны 2024 елның октябрендә Уфада физкультура һәм спортны үстерү советы утырышында яңгыратты. «Без аны (программаны) башкара алабыз. 2025 елдан башлап җибәрергә. Сездән, Владимир Владимирович, безгә ярдәм итүегезне сорыйбыз», — дип мөрәҗәгать иткән ул Владимир Путинга утырышта.

«Земский тренер» программасын гамәлгә ашыруны республикада 2026, 2027 һәм 2028 елларга планлаштырганнар. Бу вакыт эчендә 126 тренерны җәлеп итү максаты тора — һәр сезонда 42шәр. Димәк, финанслауның гомуми күләме 126 млн сум тәшкил итәчәк — һәр белгечкә миллион түләргә туры киләчәк. Бу сумманың 61,74 миллионын РФ спорт министрлыгы, ә 64,26 миллионын Татарстан бүлеп бирәчәк, ягъни өлешләр плюс-минус яртылаш бүленгән.

Исегезгә төшерәбез, Татарстанда, бөтен Россиядәге кебек үк, табиблар өчен дә шундый ук чаралар гамәлдә. Авылга эшкә күчкән медикларга «Земский доктор»программасы буенча бер мәртәбә бирелә торган компенсация түлиләр. Түләү күләме 500 меңнән 1,5 млн сумга кадәр тәшкил итә. Шул ук вакытта хезмәт килешүе кимендә биш елга төзелә.

Моннан тыш, 50 меңнән азрак кеше яши торган торак пунктларга күчеп килгән укытучыларга да бер мәртәбә 1әр млн сум акча түлиләр.