Татарстанда бик сирәк очрый торган эчәклек аномалиясе белән туган сабыйга уңышлы операция ясаганнар

Бу хакта Татарстанның сәламәтлек саклау министры Альмир Абашев хәбәр итте.

– 5–10 мең яңа туган сабыйга бер генә очрый торган тумыштан дуоденаль үтә алмаучанлык – эчәклек үсеше аномалиясе. Бу эмбриональ үсеш барышында эчәклекнең дөрес формалашмавы нәтиҗәсендә барлыкка килә. Мондый патология булганда бала туклана да, туклануны үзләштерә дә алмый, – дип язды министр.

Сирәк очрый торган әлеге аномалия сабыйның әле ана карынында үсеш чорында ук ачыкланган. Бала Республика клиник хастаханәсенең перинаталь үзәгендә дөньяга килгәннән соң, аны Республика балалар клиник хастаханәсенең яңа туган сабыйлар реанимациясе бүлегенә күчергәннәр.

Өстәмә тикшерүләр вакытында табиблар уникебармаклы эчәкнең ике сегменты тулысынча аерылган булуын ачыклаган. Шуңа күрә кечкенә пациентка ашыгыч операция ясарга туры килгән.

Операция уңышлы узган. Хәзер сабый мөстәкыйль сулый, энтераль туклану башланган. Алга таба дәвалану өчен ул Республика балалар клиник хастаханәсенең кече яшьтәге балалар хирургиясе бүлегенә күчерелгән.

Табиблар билгеләп үткәнчә, мондый катлаулы патологияләрне йөклелек вакытында иртә ачыклау һәм операцияне вакытында үткәрү сабыйның сәламәтләнү мөмкинлеген сизелерлек арттыра.