Татарстанда диспансеризациягә 9,7 млрд сум акча бүлеп бирү планлаштырыла

Бу хакта ТР Дәүләт Советының Социаль сәясәт комитеты утырышында Татарстанның Мәҗбүри медицина иминияте территориаль фонды директоры Алсу Мифтахова хәбәр итте.

Утырышта фондның 2027–2029 елларга бюджеты турындагы закон проекты беренче укылышта каралды.

Киләсе елда диспансеризация үткәрүгә 9,7 млрд сум бүлеп бирү планлаштырыла. Бу — быелгы күрсәткечтән 740 млн сумга күбрәк. Быел әлеге максатларга 8,9 млрд сум каралган.

Онкологик авыруларны дәвалауга чыгымнарны да арттыру ниятләнә. 2027 елда бу юнәлешкә 9 млрд сум акча бүлеп бирү күздә тотыла. Бу агымдагы ел белән чагыштырганда 500 млн сумга күбрәк. Медицина реабилитациясенә финанслау 220 млн сумга артып, 2,2 млрд сумга җитәчәк.

Социаль әһәмияткә ия медицина ярдәменә, шул исәптән наркология һәм венерология хезмәтләренә, туберкулезны һәм психик авыруларны дәвалауга 8,1 млрд сум юнәлдерү планлаштырыла.

Моннан тыш, паллиатив ярдәмгә 760 млн сум, ашыгыч медицина ярдәме машиналары йөртүчеләренә һәм фтизиатрия хезмәткәрләренә өстәмә түләүләргә 338,6 млн сум каралган. Аерым категория гражданнарга теш протезлары ясау өчен 184,5 млн сум бүлеп бирү ниятләнә.

Фаразлар буенча, Татарстанның Мәҗбүри медицина иминияте территориаль фонды керемнәре 2027 елда 105,6 млрд сум, 2028 елда 112,8 млрд сум, ә 2029 елда 117 млрд сум тәшкил итәчәк. Өч еллык чорда чыгымнарның керемнәргә туры килүе планлаштырыла.

Диспансеризация «Дәвамлы һәм актив тормыш» илкүләм проекты кысаларында үткәрелә.