Татарстанда илкүләм проектларны гамәлгә ашыруга 53 миллиард сум акча юнәлдерәчәк

Бүлеп бирелгән акчалар татарстанлыларның тормыш сыйфатын яхшыртуга сарыф ителәчәк. Биредә сәламәтлек саклау, мәгариф, мәдәният, экология, торак-коммуналь хуҗалык һәм төзекләндерү өлкәләре турында сүз бара.

«Яшәү өчен инфраструктура» һәм «Экология» илкүләм проектлары кысаларында 42 парк һәм скверны төзекләндерү, 17 инженерлык инфраструктурасы объектын яңарту, шулай ук Казанның ләм кырларын рекультивацияләү һәм Чаллыдагы Мәләкәскә елгасы үзәнен чистартуны төгәлләү күздә тотыла.

«Иң яхшысы - балаларга » һәм «Гаилә» илкүләм проектлары гаилә һәм үсеп килүче буын турында кайгыртуга юнәлдерелгән. Алар буенча республикада алты балалар бакчасы төзеләчәк, республиканың муниципаль районнарында ике мәктәпкәчә учреждение һәм 36 мәктәпкә, шулай ук Түбән Камада Н.В.Лемаев исемендәге нефть химиясе һәм нефть эшкәртү көллиятенә һәм Арчада Габдулла Тукай исемендәге Арча педагогика көллиятенә капиталь ремонт ясалачак.

«Гаилә кыйммәтләре» төбәк проекты буенча дүрт сәнгать мәктәбе төзелер һәм 22 мәдәният объекты ремонтланыр дип көтелә. Болар - алты авыл мәдәният йорты, ике сәнгать мәктәбе, тугыз китапханә, өч музей һәм ике театр.

Транспорт инфраструктурасы, халыкка һәм эшмәкәрлеккә социаль ярдәм күрсәтү дә игътибарсыз калмаячак: Татарстанда автомобиль юллары, күперләр төзү һәм реконструкцияләү, учреждениеләрне заманча җиһазлар белән тәэмин итү, икътисадның социаль тармакларын цифрлаштыру, балалы гаиләләргә һәм эшмәкәрләргә ярдәм чараларын гамәлгә ашыру дәвам итәчәк.

Илкүләм проектларны гамәлгә ашыру кысаларында яшьләргә һөнәри һәм патриотик тәрбия бирү чаралары, шулай ук республика икътисадының барлык тармакларында хезмәт җитештерүчәнлеген арттыруга юнәлдерелгән проектлар эшнең мөһим өлеше булып калачак.

Татарстан 2026 елда 12 илкүләм проектны («Гаилә», «Яшьләр һәм балалар», «Кадрлар», «Озын һәм актив тормыш», «Туризм һәм кунакчыллык», «Тормыш өчен инфраструктура», «Пилотсыз авиация системалары», «Экологик иминлек», «Азык-төлек иминлеген технологик тәэмин итү», «Нәтиҗәле һәм көндәшлеккә сәләтле икътисад», «Мәгълүматлар һәм цифрлы трансформация», «Халыкара кооперация һәм экспорт») гамәлгә ашыруда катнаша.

Чыганак: Татар-информ