Татарстанда «Каршы як полоса»профилактик чарасы узачак. Соңгы ике айда 21 кеше һәлак булган

Бу турыда ТР Дәүләт автоинспекциясе хәбәр итте.

ЮХИДИ мәгълүматларына караганда, ел башыннан бирле каршы як полосага чыгу аркасында 45 юл-транспорт һәлакәте теркәлгән. Әлеге аварияләрдә 21 кеше һәлак булган, 75 кеше төрле дәрәҗәдә җәрәхәтләр алган.

Белгечләр ассызыклаганча, бу саннар — гади статистика гына түгел. Аларның һәркайсы кеше фаҗигасен, кире кайтарып булмаслык югалтуны яки авыр җәрәхәтләрне аңлата.

Юл хәрәкәте кагыйдәләрен бозып каршы як полосага чыккан өчен 7500 сум күләмендә штраф яки 4 айдан 6 айга кадәр машина йөртү хокукыннан мәхрүм итү каралган. Ә кагыйдәне кабат бозган очракта, йөртүче 1 елга кадәр транспорт чарасы белән идарә итү хокукыннан мәхрүм ителә.

Дәүләт автоинспекциясе машина йөртүчеләрне юлда аеруча сак булырга чакыра.

Юл шартларын һәм һава торышын исәпкә алу, хәвефле маневрлардан баш тарту — аварияләрне киметүнең төп шарты.

Белгечләр искәртә: берничә минут вакыт оту теләге беркайчан да кеше гомере бәясенә торырга тиеш түгел.