Татарстанда мәдәни мирас объектларын яңартучы инвесторларга ташламалы кредит бирелә

Кредит ставкасы 9 проценттан артмый, аны реставрация эшләренә дә, проект документациясе әзерләүгә дә алырга мөмкин.

Шулай ук тарихи биналарда кунакханә ачуны планлаштырган инвесторлар өчен 6 процентлы ташламалы кредит каралган. Моның өчен объектның мәйданы кимендә 500 кв. метр, ә кунакханәдә 10 номердан ким булмаска тиеш.

Моннан тыш, «Объект за рубль» программасы буенча инвесторлар тарихи биналарны символик бәягә сатып ала ала. Әмма яңа хуҗа аларны билгеләнгән вакытта реставрацияләргә тиеш.

Татарстанда әлеге юнәлешкә дәүләт ярдәме дә күрсәтелә. Алабугада инвесторлар сатып алган алты мәдәни мирас объектын торгызу өчен проект документациясен әзерләүгә 38 миллион сумнан артык акча бүлеп бирелгән. Шундый ук тәҗрибәне Чистайда да куллану мөмкинлеге карала.