Татарстанның бер районында балалар бакчасы түбәсе ишелү сәбәпле җинаять эше кузгатылган

Тикшерү барышы һәм аның нәтиҗәләре турында Россия Тикшерү комитеты рәисе Александр Бастрыкинга җиткерәчәкләр. Бу хакта ведомствоның матбугат хезмәте хәбәр итә.

Әлеге хәл 2 февральдә Иске Чүпрәле авылындагы 1 нче «Кояшкай» балалар бакчасында булган. Беренчел мәгълүматларга караганда, кардан тиешенчә чистартылмау сәбәпле түбә ишелеп төшәргә мөмкин.

Район башлыгы Марат Гафаров белдергәнчә, әлеге хәл аркасында зыян күрүчеләр юк.

Билгеле булганча, балалар бакчасы түбәсенә капиталь ремонт 2011 елда ясалган. Ә 2024 елда учреждениедә эчке эшләр башкарылган, шулай ук территориясе төзекләндерелгән.

Хәзерге вакытта тикшерү һәм торгызу эшләре алып барыла. Шул сәбәпле балалар бакчасы вакытлыча ябылган, ә анда йөрүче балалар райондагы башка мәктәпкәчә белем бирү учреждениеләренә күчерелгән.