Татарстанның бер районында «глава»ны алмаштыралар

Татарстан Министрлар Кабинетының Баш ветеринария идарәсе башлыгы Алмаз Хисаметдинов Арча районы администрациясе башлыгы вазифаларын башкаручы булырга мөмкин. Бу хакта “Татар-информ”га үз чыганаклары хәбәр иткән. Яңа билгеләнү турында район советы утырышында игълан ителәчәк, ә яңа җитәкчене Татарстан Дәүләт Советы Рәисе Фәрит Мөхәммәтшин тәкъдим итәчәк. 
Алмаз Хисаметдинов Татарстан Министрлар Кабинетының Баш ветеринария идарәсен 2013 елдан бирле җитәкли. Моңа кадәр ул Мамадыш районы башлыгы урынбасары урынын биләгән. «Татарстан Республикасының атказанган ветеринария табибы» һәм «Россия Федерациясенең атказанган авыл хуҗалыгы хезмәткәре» дигән мактаулы исемнәргә ия.