Төбәкләр Бөек Ватан сугышы ветераннарын торак белән тәэмин итәчәк

Россия төбәкләре хакимияте 2025 елның 1 апреленә кадәр торак шартларын яхшыртуга мохтаҗлар исәбендә торучы Бөек Ватан сугышы ветераннарын торак белән тәэмин итәчәк, дип сөйләгән РИА Новостига Дәүләт Думасының төзелеш һәм торак-коммуналь хуҗалык комитеты рәисе урынбасары Сергей Колунов.

"Агымдагы елның 1 апреленә кадәр Бөек Ватан сугышының барлык ветераннары, шулай ук һәлак булган яки вафат булган сугыш ветераннарының торак шартларын яхшыртуга мохтаҗлар исәбендә торучы гаилә әгъзалары торак белән тәэмин ителәчәк", - диде Колунов.

Ул билгеләп үткәнчә, әлеге инициатива Россия Федерациясе Хөкүмәте тарафыннан 2020 елда расланган Бөек Ватан сугышы ветераннарының социаль-икътисади хәлен яхшырту буенча чаралар комплексы нигезендә гамәлгә ашырылачак. Аның сүзләренчә, анда беренче пункт итеп торак белән тәэмин итү язылган, моннан тыш, җаваплы ведомство итеп төзелеш министрлыгы күрсәтелгән. Шулай ук Колунов әлеге йөкләмә Россия Президенты Владимир Путинның Җиңүнең 80 еллыгын бәйрәм итүгә әзерлек һәм аны уздыруга багышланган 2023 елгы указы нигезендә үтәләчәген өстәде.

Парламентарий ассызыклаганча, әлеге бурычны үтәүгә кирәкле федераль бюджет акчалары төбәкләргә тулы күләмдә китерелгән, РФ субъектларына мохтаҗлар исемлеге дә расланган.

"Безне фашист явызлыгыннан коткарган, безгә тормыш биргән буын-безнең геройларыбыз. Без бүген булган бөтен нәрсәбезгә аларга бурычлы. Һәм һичшиксез ветераннарга һәм аларның гаиләләренә ярдәм чаралары өстендә эшләүне дәвам итәчәкбез", - дип йомгаклады ул.