Түбән Камада гадәттән тыш хәл: яшүсмер мәктәптә петарда шартлаткан һәм җыештыручыга пычак белән һөҗүм иткән

«7 нче сыйныф укучысы пычак белән һөҗүм итеп, җыештыручының кулын җәрәхәтләгән. Аның гомеренә куркыныч янамый, барлык кирәкле ярдәм күрсәтелә. Эчке эшләр органнары һәм Росгвардия хезмәткәрләре көче белән һөҗүм итүче тоткарланды, хәзерге вакытта аның белән эш алып барыла, мәктәпкә ата-аналары чакырылды. Барлык укучылар эвакуацияләнде, аларның берсе дә зыян күрмәде.

Барлык ашыгыч хезмәтләр урында эшли, вәзгыять контрольдә тотыла. Паникага бирелмәвегезне сорыйбыз. Якынча мәгълүматлар буенча, ул өч петарда шартлаткан, шуннан соң җыештыручыга һөҗүм иткән һәм качкан. Соңрак аны тоткарлаганнар.

Әлеге хәлнең сәбәпләре компетентлы органнар тарафыннан ачыкланачак. Киләчәктә мондый очракларны булдырмау һәм профилактикалау буенча тиешле эш алып барылачак» дип хәбәр итә Беляев.