Тукай нинди ризыкларны ашарга яраткан?

Әлегә Мәдәният министрлыгы тарафыннан  республика планы әзерләнә.

Мәдәният министры беренче урынбасары Дамир Нотфуллин сүзләренчә, киләсе елда Яңа Кырлай авылында Габдулла тукай әдәби-мемориал музей комплексы, “Туган тел” һәйкәле ачылышы да планлаштырыла.  

Тукайның туган көненә багышланган чараларны “Күңел адреслары. Тукай” экскурсияләр маршруты башлый. Экскурсия Тукай музее-Юнысовлар мәйданы-Татар утары-Тинчурин театры маршруты буенча барачак.

Кунаклар Тукай музее буенча экскурсиядән соң, Юнысовлар мәйданында тукталып Габдулла Тукайның чордашлары турында да әңгәмә корачак. “Фатих Әмирхан тууына да киләсе елда 140 ел була, шуңа бу экскурсиядә Тукай турында гына түгел, аның чордашлары турында да сөйлиячәкбез”, - дип аңлатты милли музей җитәкчесе Айрат Фәйзрахманов.

Моннан соң, кунаклар Татар утарына тукталып, Тукай яратып ашаган ризыкларны татып караячак. “Үрдәк итеннән аш, борай боткасы, пәрәмәчне Тукай аеруча яратып ашаган”, - ди ресторан хуҗасы Зөфәр Гаязов.

Тинчурин театрында исә, кунаклар ясалма фәһем ярдәмендә ясалган фильмны караячаклар.

“Фильмны тулысынча ясалма фәһем ясый, ә безнең актерларыбыз аны шәрехләп барачак. Бу фильмда без Тукайның Казанга килгәнче булган тормышын күрсәтәчәкбез”, - дип аңлатты театрның баш режиссеры Айдар Җаббаров.

Киноны ясалма фәһем “Исемдә калганнар” әсәренә нигезләнеп эшли.

“Күңел адреслары. Тукай” экскурсиясе беренче тапкыр 5 гыйнвар узачак. Экскурсия 3 сәгатькә якын бара.