Халык фикере мөһим: Татарстанда муниципаль хакимиятләр эшен бәялиләр

Республика халкы әлеге тикшеренүдә катнашып, шәһәр һәм район хакимиятләре эшенә, шулай ук халыкка хезмәт күрсәтүче оешмаларның эшчәнлегенә үз фикерен белдерә ала. Бу хакта ТР Икътисад министрлыгының матбугат хезмәте хәбәр итә.

Сораштыру цифрлы сервислар ярдәмендә үткәрелә. Аның кысаларында шәһәр округлары һәм муниципаль районнарның җирле үзидарә органнары, шулай ук социаль әһәмияткә ия хезмәтләр күрсәтүче оешмалар җитәкчеләренең эшенә бәя бирелә.

Тикшеренүнең төп максаты — гражданнарның муниципаль хакимиятләр эшеннән һәм күрсәтелә торган хезмәтләрнең сыйфатыннан канәгатьлек дәрәҗәсен ачыклау. Катнашу өчен махсус портал аша кереп, Бердәм идентификация һәм аутентификация системасы (ЕСИА) ярдәмендә авторизация узарга кирәк.

Сораштыру нәтиҗәләре гомумиләштерелгән рәвештә кулланылачак һәм җирле үзидарә органнары эшен, шулай ук республика муниципаль берәмлекләрендә яшәүчеләргә хезмәт күрсәтүче оешмаларның эш сыйфатын камилләштерү өчен нигез булачак.

2025 елда әлеге сораштыруда 45 375 кеше катнашкан.