Зәйдә XIII «Ялчыгол укулары» узды

Чара бөек мәгърифәтче, галим һәм дин әһеле Таҗетдин Ялчыголның рухи мирасын, фәнни һәм әдәби эшчәнлеген өйрәнүгә багышланды.

Укуда Татарстан Диния нәзарәте рәисе урынбасары Равил хәзрәт Зөфәров, ТР Рәисе каршындагы Мәдәниятне үстерүгә ярдәм фонды башкарма директоры Нурия Һашимова, ТРның Дини берләшмәләр белән үзара хезмәттәшлек идарәсенең дәүләт-конфессиональ мөнәсәбәтләр бүлеге баш киңәшчесе Гадел Хәсәншин, Бөтендөнья татар конгрессы башкарма комитеты җитәкчесе урынбасары Ирек Шәрипов, филология фәннәре докторы, академик Хатыйп Миңнегулов, язучы Рухия Ахунҗанова, Санкт-Петербург фән һәм сәнгать академиясенең мөхбир әгъзасы Марсель Гарипов, Таҗетдин Ялчыголның нәсел дәвамчылары, дин әһелләре һәм район активы катнашты.

Кунакларны район башлыгы Разиф Кәримов озатып йөрде. Алар Зәйнең истәлекле урыннары белән танышты.

Укулар Таҗетдин Ялчыголның туган ягы — Имәнлебашта аның каберенә зиярәт кылудан башланды. Мәгърифәтче рухына дога кылынды.

Чара барышында Таҗетдин Ялчыголның иҗади һәм фәнни мирасы, татар мәгърифәтчелеге тарихындагы урыны турында фикер алышулар узды. Укучылар бөек якташның рухи кыйммәтләрен киләчәк буыннарга җиткерүнең мөһимлеген ассызыклады.