«Апуш» татар балалар театр студиясе Ижау шәһәрендә Татарстан данын яклады

Исегезгә төшерәбез, фестивальнең финалына Идел буе федераль округының барлык субъектларыннан 28 спектакль чыккан идек. 27 март – Халыкара театр көнендә алар арасында онлайн форматта тавыш бирү этабы узды. Аның нәтиҗәләре буенча «Апуш» студиясенең Ленин исемендәге мәдәният йортында шөгыльләнүче «Без» төркеме берьюлы 3 номинациядә – «Иң яхшы балалар спектакле», «Иң яхшы режиссер эше» һәм «Иң яхшы сәнгать бизәлеше» номинацияләрендә җиңү яулады. 

21 апрель көнне ачылыш тантанасы Удмуртиянең халык иҗаты йортында узды. Биредә «Апуш» шәкертләре студиягә җиңү китергән «Мәкәрҗәдә театр» спектаклен тәкъдим итте. Килгән кунакларны Удмуртия Республикасы Хөкүмәте Рәисе урынбасары Наталья Тойкина сәламләде: «“Театраль Идел буе”ның җиденче сезоны 25 мең катнашучыны берләштерде – бу сан чыннан да гаҗәпләндерә һәм проектның масштабын чагылдыра», – диде. 

Фестиваль кысаларында бик бай эчтәлекле программа әзерләнгән иде. Дүрт көн дәвамында 200 катнашучы 7 спектакль карады. Катнашучылар Ижау шәһәренең данлыклы зоопаркында һәм бөек композитор П.И.Чайковскийның туган ягы – Воткинск шәһәрендә булдылар, Лудорвай музей-тыюлыгына экскурсиягә бардылар һәм Удмуртиянең бай тарихы, мәдәнияте белән таныштылар. Калган көннәрдә катнашучылар һәм коллектив җитәкчеләре өчен остаханәләр үткәрелде. ГИТИС педагоглары – театр һәм кино актеры, режиссер Александр Гришин актерлык осталыгы буенча тренинг, ә актер, режиссер, театрда һәм кинода фехтование һәм трюк пластикасы куючы белгеч Дмитрий Иванов пластика буенча тренинг уздырды.

Фестивалнең бүләкләү тантанасы 24 апрель көнне Удмуртиянең Дәүләт милли театрында узды. Россия Президентының Идел буе федераль округындагы тулы вәкаләтле вәкиле Игорь Комаров исеменнән катнашучылар һәм кунаклар алдында тулы вәкаләтле вәкил урынбасары Олег Машковцев чыгыш ясады.

«Апуш» студиясен Удмуртия Республикасы башлыгы Александр Бречалов бүләкләде һәм аларга истәлекле бүләкләр тапшырылды. 

«Апуш» шәкертләре һәм остазларын чын күңелдән әлеге зур җиңүләре белән котлыйбыз. Алга таба да зурдан-зур иҗади уңышлар телибез һәм яңа спектакльләрен көтеп калабыз!