«Бүгенге очрашуыбызга шатмын»: Рөстәм Миңнеханов Әлмәт театрында

Бу хакта ТР Рәисе Матбугат хезмәте хәбәр итте.

Әлмәт күчмә драма театрына 1944 елда нигез салына. Башта ул Мәдәният йортында нигезләнә, ә 1989 елның мартында Техника йортына күчә. Бүген республиканың иң уңышлы һәм танылган коллективларының берсе. Репертуарында - татар, рус, дөнья драматургиясе классикасы, шулай ук хәзерге авторларның әсәрләре. Театр эшләгән елларда аның сәхнәсендә 400гә якын спектакль куелган.

Ел саен Әлмәт театры 7-8 премьера спектакле чыгара, шулай ук күп гастрольләрдә йөри. Театр Татарстанда да, Россиянең башка төбәкләрендә дә киң танылган. 2017 елда труппа беренче тапкыр Ауропага фестивальгә чыккан.

Быел театрда «Мәдәният» илкүләм проекты буенча башкарылган капиталь ремонт төгәлләнгән. Театрда тәрәзәләр, ишекләр, керү төркеменең кәрнизләре, түшәмнәр һәм яктырткычлар алмаштырылган, хореография залы һәм кече зал ремонтланган.

Рөстәм Миңнеханов яңартылган мәдәни киңлекне карады, театр коллективы белән аралашты, шулай ук «Минем яшьлек йорты» иммерсив спектаклен карады.

«Бүгенге очрашуыбызга шатмын. Без үз коллективларыбызның, мәдәният һәм сәнгать эшлеклеләренең казанышлары белән горурланабыз. Нәкъ менә мәдәният җәмгыятебез үсешенең рухи-әхлакый нигезләрен ныгытуга, социаль өлкәдәге конкрет проблемаларны һәм бурычларны хәл итүгә ярдәм итә. Татарстан - гражданлык тәңгәллеген, Россия дәүләтчелеген, милләтара һәм конфессияара тынычлыкны һәм татулыкны ныгыту үрнәге», - диде Рөстәм Миңнеханов.

Ул ассызыклаганча, яңа чакырулар шартларында милли сәясәтне гамәлгә ашыруның иң беренчел бурычларының берсе - Россия милли мәдәниятләренең күптөрлелегенең аерылгысыз өлеше булган традицион рухи-әхлакый кыйммәтләрне саклау һәм арттыру. Моның өчен республикада тармакның инфраструктурасын актив үстерәләр.

«Мәдәният» илкүләм проекты кысаларында узган ел Әлмәт театры бинасына капиталь ремонт ясалган. Без сездән яңа якты куелышлар һәм югары казанышлар көтәбез. Моның өчен барлык шартлар да тудырылган», - дип мөрәҗәгать итте Рөстәм Миңнеханов артистларга.

Аннары Татарстан Рәисе Әлмәт театры коллективына «Мәдәният һәм сәнгатьтәге казанышлары өчен» орденын тапшырды. Бүләк мәдәният һәм сәнгать өлкәсендәге казанышлары, күпьеллык нәтиҗәле эшчәнлеге өчен РФ Президенты Указы белән бирелә.