“Илһам” бәйгесе: яшь язучы-шагыйрьләрне бөртекләп барлыйлар

Бу юлы да конкурсның географиясе һәр елдагыча киң булган.  Пермь, Саратов, Киров өлкәләреннән дә, Башкортстан, Чувашия Республикаларыннан да, Оренбург, Ульяновсктан да иҗади эшләр кабул ителгән.  Шуларның иң өметлеләрен Казан федераль университетының Филология һәм мәдәниятара багланышлар институтында бүләкләделәр.

Казан федераль университетының Филология һәм мәдәниятара багланышлар институты директоры Рәдиф Җамалетдинов тантанага чакырылучыларны милләтебезнең, әдәбиятыбыз-мәдәниятебезнең кичәчәге дип атады, аларга зур өметләр баглануын ассызыклады.

-    Каләм тибрәтү дә, әдәбият, тел, сәнгать мәсьәләләре белән кызыксыну да нәкъ мәктәп яшеннән башлана. Сезнең эшләрегезне карадык. Бик үзенчәлекле эшләр җибәргәнсез. Киләчәктә без сезне үзебезнең Казан университетында көтеп калабыз, - дип, Рәдиф Җамалетдинов биредә һәркемнең үзенә кызыклы юнәлешне таба алуына ышаныч белдерде. 

“Илһам” бәйгесенә быел барлыгы 680 эш кабул ителгән, шуларның 300е икенче турга үткәрелгән. Балаларның эшләрен Данил Салихов, Галимҗан Гыйльманов, Рәдиф Сәгъди, Рәмис Әймәт, Марат Закир, Рифат Салах, Халисә Ширмән кебек танылган язучылар, шагырьләр, драматурглардан торган мәртәбәле жюри бәяләгән.
Аннары жюри әгъзалары беренчел сайлау аша узучыларның һәркайсы белән очрашып-сөйләшеп, аларның талантларын ачарга омтылган. 

-    Бу ярышта җиңүчеләр юк. Чөнки каләмгә тотынган һәр кеше ул үзенең хис-тойгыларын халыкка җиткерергә тели. Киләчәктә аның үз сүзе, үз фикере дә булачак. Шуңа күрә каләм тоткан, каләмгә омтылган яшьләр, сез һәрберегез безгә кадерле. Әлбәттә, каләмгә беренче тотынып, нәрсәдер әйтергә теләү, исемеңне матбугатта күрү ул әле шагыйрь, язучы булдым дигән сүз түгел. Барыгыз да шагыйрьләр дә, язучылар да булмаячак, чөнки бу сирәк очрый торган яшәү рәвеше. Аны һөнәр дип тә әйтеп булмый. Ләкин әдәбиятка һәм тарихыбызга гашыйк булган кеше ул инде беркая да югалмый, - дип билгеләде Татарстан Язучылар берлеге рәисе Ркаил Зәйдулла.

Бүләкләү тантанасы барышында поэзия, проза, драматургия юнәлешендә, журналистик жанрда иң яхшы эш авторлары сәхнәгә чакырылып, лаеклы диплом-бүләкләрен алды.