Юбилярның түшендә - “Дуслык” ордены

Мәскәүдә Щепкин исемендәге театр училищесын 1961 елда тәмамлаган татар артистлары. Алар элек шактый күп булсалар да, бүген, кызганыч, өчәү генә калганнар: Равил Шәрәфи, Батулла һәм Әзһәр Шакиров үзләрен шаяртып” йомычкалылар” дип тә йөртәләр еш кына. Ләкин һәрберсе нәни йомычка түгел, ә сәнгать океанында, театр диңгезендә давылларга каршы бара ала торган дәү кораб. Шуларның иң яше-төпчеге Әзһәр Шакировка да 85 яшь тулган. Һәм 24 февраль көнне туган театрларында үзган юбилей аның иҗатын яраткан, үзен хөрмәт иткән бик күпләр өчен зур бәйрәмгә әйләнде.

Алма төшәргә дә урыны булмаган, шыгрым тулы зал үз артистын аягурә басып, озак алкышлап каршы алды. Бу хөрмәт милли театрыбызга алтмыш еллык тугры хезмәт, 120дән артык образлар, чын мәгънәсендә, сәхнәдә узган гомер өчен. Халык мәхәббәтенә хөкүмәтнең олы бәяләве ә өстәлде. Юбилярның түшен “Дуслык” ордены бизәде. Аны такканда ТР Дәүләт Советы Рәисе Фәрит Мөхәммәтшин Тукай бүләге иясе, халык артистының бөеклеген ассызыклап болай диде. “Аның теләсә кайсы роле спектакльнең йөзек кашы. Ювелир эш.” Артистның бүген дә сәхнәдә булуына соклануын да яшермәде. Яшь артистларның остазлары булган өчен кабат рәхмәт әйтте һәм беренче Президентыбыз Минтимер Шәймиевның котлавын да җиткерде. “Мин рус мәктәбен тәмамлаган, рус авылында туып – үскән кеше бүген тырыша- тырыша туган телем - татар телен Ул уйнаган спектакльләрне карап өйрәнәм. Аның сөйләвендәге моң - аһәң миңа туган телемә мәхәббәтне көннән-көн арттыра, ” - диде Фәрит Мөхәммәтшин. Туган телем, халкым-милләтем дип җаны сызланган артист өчен, моннан да зур бәя була алмый инде.

Юбилярны котларга якташлары - Азнакай районы вәкилләре дә, ут күршеләребез: Башкортстан, Чувашстаннан сәхнә йолдызлары да килгән иде. Барлык котлауларны Әзһәр ага аксакалларча тыйнак кына кабул итте, чал башын иеп рәхмәт әйтте. Бу рәхмәт туган авылыннан яланаяк алып чыгып китеп, зур артист иткән, беренче һәм соңгы мәхәббәте Саҗидәсе белән очраштырган язмышына да, иҗатына мөкиббән булган тамашачасына да иде.

Кичә азагында халык теленә “елак” дип кергән, хәтта шундый кинофильмда да уйнаган Әзһәр Шакировның тавышы нигә шундый үзенчәлекле икәнен дә аңладык. Ул бөек милләтенең данлы үткәнен яхшы белә, ә менә киләчәге өчен бар җаны-тәне белән сызлана, шуңа йөрәге елавы тавышында да чыгыла икән бит. Ә артистның иң яраткан җыры “Әйтмә син авыр сүз. ” Әйе, туган телебездә иң матур сүзләрне генә сөйләшеп озын-озак яшәргә насыйп булсын иде барлык милләттәшләребезгә дә.