«Китап поезды» Казанга килә: шәһәргә бер вагон язучы җыелачак

8 сентябрьдә Казанда язучылар белән очрашулар, китап фестивальләре һәм әдәби чаралар узачак

“Китап поезды” проектында танылган язучылар, нәширләр, режиссерлар, галимнәр, мәдәният эшлеклеләре, китапханә һәм мәгариф тармагы вәкилләре катнашыр дип көтелә.

Татарстан мәдәният министрының беренче урынбасары Юлия Әдһәмова билгеләп узганча, проект Россия халыклары бердәмлеге елына, Владимир Дальнең 225 еллыгына һәм Михаил Салтыков-Щедринның 200 еллыгына багышланган. «Китап поезды» Казанга 8 сентябрьдә – Россия халыклары телләре көнендә килеп җитәчәк”, – дип хәбәр итте ул матбугат очрашуында. Уникаль осталар үзәгендә "Россия халыкларының мәдәни коды" пленар утырышы узачагын һәм мәктәп укучылары өчен “Россия халыклары телләрендә әкиятләр укыйбыз” акциясе оештырылачагын да ассызыклады.

Казанда мәктәп укучылары өчен 12 китап укуга багышланган конференция үтәчәк

«Китап поезды» проектының идеологы һәм җитәкчесе Денис Котов журналистлар белән онлайн аралашты. Аның сүзләренчә, "Китап поезды" программасы 300дән артык вакыйганы берләштерәчәк. Маршрут шәһәрләрендә китап фестивальләре, язучылар белән очрашулар, яңалыклар һәм автограф-сессияләр, Россия халыкларының мәдәни кодлары һәм бердәмлеге, рус теле, тарихи һәм рухи-патриотик мирас, гаилә укуы, заманча әдәбият, цифрлаштыру, ясалма интеллект һәм китапның киләчәге турында фикер алышулар, түгәрәк өстәлләр узачак.

“Проектта 50гә якын язучы катнашачак. Алар һәр шәһәрдә чыгып, 30ар вакыйга үткәрәчәк. Проект дәвамында узачак вакыйгаларның гомуми саны инде 300дән артып китте”, – диде ул. Фестивальдә балалар язучылары да булачагын аерым ассыклады. Аныңча, мәктәп укучылары елына кимендә 12 китап укырга тиеш. Әлеге уңайдан Казанда "Укучы балалар мәктәбе. 12 китап × 10 ел" конференциясе узачак.Проектның стратегик максаты – россиялеләрнең 80 проценты елына уртача 12 китап уку өчен шартлар тудыру.

Матбугат очрашуында шулай ук онлайн катнашкан язучы, сценарист Олег Рой фикеренчә, проект китап укучыларга язучылар белән очрашып, күзгә-күз аралашырга мөмкинлек бирә. “Безгә ешрак очрашырга иде”, – диде ул. Шулай ук язучы, башка төбәкләрдә яшәүчеләрнең дә Татарстанның искиткеч фәлсәфәсендә ятучы гаять зур мәдәни катламны аңласын өчен, татар авторларының әсәрләрен рус теленә мөмкин кадәр тизрәк һәм күбрәк тәрҗемә итәргә кирәклегенә басым ясады. Ә моны язучылар аша эшләргә була, диде ул.