“Китап поезды”н Казан тынлы оркестр һәм кояш белән каршы алды

Әнә бүген дә “Китап поезды”н тынлы оркестр һәм елмаеп торучы март кояшы белән каршы алды. Әллә алдан заказ биреп куйганмы?! (Аларның киләсе турында без бер язган идек инде.) Аннары Питер әдипләре Татарстан Республикасы милли китапханәсенә зур сөйләшүгә килделәр. Аларны анда республикакабызда бергә дус- тату яшәүче төрле милләт вәкилләре булып киенгән кызлар - егетләр каршылады. Кунаклар китапханәнең матурлыгына сокланып туялмадылар.

Пленар утырышка уңышлы эш теләргә, сәламләргә юк вакытларын бар итеп, Татмедиа” Республика агентлыгы җитәкчесе Айдар Сәлимгәрәев, Татарстан Мәдәният министры урынбасары Дамир Нотфуллин, Татарстан Язучылар берлеге рәисе Ркаил Зәйдулла да килгән иде.

Россия һәм региональ китап нәшер итүгә багышланган бу җитди сөйләшүдә үтә дә зур проблемалар күтәрелде. Замана укучысы күңеленә, зәвыгына туры килә торган, ул кулыннан куймый” егылып” укый торган китапны ничек “тудырырга”? Максатлар зур, ил халкының 80 % елына 12 китап укытырга. Бер караганда зур сан да түгел - ай саен 1 китап кына. Ләкин китап урынын эреле -ваклы экраннар, гаджетлар алганда бик ансат та түгел. Сөйләшүдә үзебезнең җирле нәшрият җитәкчеләре дә катнашты. Татарстан китап нәшрияты директоры Илдар Сәгъдәтшин чыгышында шатлык та горурлык та тоемланды. 106 еллык бу нәшриятыбызның соңгы елларда “табасыннан төшкән” яңа китаплары теләсә кайсы илгә алып барсаң да йөзне кызарта торган түгел.

Заманча мәдәният үзәге “СМЕНА”ның оештыручысы Кирилл Маевский, “Эксмо- АСТ”партнерлык программасы җитәкчесе Ольга Прохорова да китапка битараф булмауларын, аның өчен җаннары әрнүен әйттеләр. Пленар утырышны Татарстан Республикасы Милли китапханә директоры Мәдинә Тимерҗанова  бик җанлы алып барды.

Бу бик кирәкле эшнең “Китап поезды”н оештыруның башында торган “Россиянең китап маяклары” фестиваль хәрәкәте президенты Денис Котов чараның файдалы булуына ышануын белдерде. Алайса хәлләр бер дә мактанырлык түгел бит. Замана яшьләре балалары Бөек Ватан сугышы турындагы әсәрләрне бик начар белә яки бөтенләй белми. Ил Бөек Җиңүнең 80 еллыгын бәйрәм итәргә әзерләнгәндә, бу бит гафу итә алмаслык. Менә шушы дистә еллар җыелып килгән гөнаһны төзәтергә дип кузгалганнар инде алар бер төркем язучылар. Максатларына ирешсәләр, без дә бергәләп ярдәм итсәк, илебез элеккеге кебек кабат иң күп укый торган илгә әйләнмәсме әле.