«Саумы, Казан!» бүләкләү тантанасы: иҗат аша башкалага мәхәббәт

16 декабрь көнне Б. Шаһиди урамы, 7 адресы буенча урнашкан бина артларында «Саумы, Казан!» конкурсы нәтиҗәләре буенча бүләкләү тантанасы узды. Дүртенче ел рәттән үткәрелә торган әлеге бәйге иҗат кешеләрен бер мәйданга җыйды һәм башкалабызга булган мәхәббәтне сүз һәм сәнгать аша яңгыратты.

Географиясе киң, телләре бай

Быел конкурс шагыйрьләрнең татар һәм рус телләрендә иҗат ителгән әсәрләрен колачлады. Катнашучылар Татарстан белән генә чикләнмичә, Россиянең төрле төбәкләреннән, шулай ук Казахстан, Үзбәкстан, Башкортстан, хәтта Ираннан да килгән. Алар барысы да үз иҗатында Казан образын ачарга тырышты.

Исегезгә төшерик: узган ел бәйге декоратив-гамәли сәнгатькә багышланган иде, ә быел поэзия үзәктә булды.

Җиңүчеләр һәм номинацияләр

Рус телендә иҗат ителгән әсәрләр:

«18–35 яшь категориясендә Казан турында шигырьләр циклы» номинациясендә
I урын — Евгения Фахуртдинова (Мәскәү)

35 яшьтән өлкәнрәкләр арасында —
I урын — Валентина Партина (Сочи)

«35 яшьтән өлкәнрәк яшь категориясендә Казан турында рус телендә поэма» номинациясендә
Җиңүче — Марина Черемисова (Казан)

Татар телендә иҗат ителгән әсәрләр:

«18–35 яшь категориясендә Казан турында шигырьләр циклы» номинациясендә
I урын билгеләнмәде

35 яшьтән өлкәнрәкләр арасында —
I урын — Гелүсә Баттал (Әтнә)

«18–35 яшь категориясендә Казан турында татар телендә поэма» номинациясендә
Җиңүче билгеләнмәде

35 яшьтән өлкәнрәк яшь категориясендә —
Җиңүче — Лилия Гыйбадуллина

Моннан тыш, махсус приз Рифат Сәләховка тапшырылды.

Музыка, шигърият һәм бердәм мохит

Кичәне «Гауга» төркеме, Ислам Валиев (Malsi Music), Илүсә Хузина, Алсу Шакирова, Булат Гатауллин, Ярослав Карц, Полина Малых һәм «Мир» хоры чыгышлары бизәде. Һәр шигырь музыкаль озату белән яңгырап, тамашачылар күңелендә тагын да тирәнрәк тәэсир калдырды.

Иҗтимагый әһәмият

«Саумы, Казан!» — әдәби бәйге генә түгел. Ул төрле шәһәрләр һәм илләрдән килгән иҗатчыларны якынайта, татар һәм рус телләренең бер мәйданда үсешенә этәргеч бирә, язучыларны яңа әсәрләр тудырырга рухландыра.

Шуны да билгеләп үтәргә кирәк: конкурс Казан Мэриясе тарафыннан, Татарстан Республикасы Рәисе каршындагы татар телен һәм республикада яшәүче халыкларның туган телләрен саклау һәм үстерү комиссиясе ярдәмендә үткәрелә.

Алинә Фәхретдинова