Хөкүмәт сәгате: Габдулла Тукай юбилеена ниләр әзер һәм әзерләнә?

Яңа Кырлай авылында, Ия елгасы үзәне буйлап, Сәгъди йортына кадәр яр буен төзекләндерү эшләре алып барыла. Мәдәни мирас объекты булган Сәгъди утары реставрацияләнә.
Татарстан Дәүләт Советының унтугызынчы утырышы кысаларында узган «Тукайның 140 еллыгын бәйрәм итүгә әзерлек һәм аны уздыру турында»гы хөкүмәт сәгатендә Татарстан мәдәният министры вазифаларын башкаручы Юлия Әдһәмова шулай дип хәбәр итте.
– Габдулла Тукай исемендәге Яңа Кырлай урта мәктәбе бакчасы территориясендә дә комплекслы төзекләндерү үткәреләчәк. Тукайның әдәби-мемориаль музеендагы ремонтлау-реставрацияләү эшләрен быелның 25 апреленә төгәлләү планлаштырыла. Моннан тыш, Татарстан Рәисе ярдәме белән Кырлай авылындагы музейда яңа экспозиция булдырыла, – диде ул.

Татарстан Фәннәр академиясе тарафыннан масштаблы тикшеренү эше алып барыла. Г. Ибраһимов исемендәге Тел, әдәбият һәм сәнгать институты Габдулла Тукай әсәрләренең элек тәрҗемә ителмәгән әсәрләрне үз эченә алган алты томлык тулы җыентыгын әзерли, дип билгеләп үтте Юлия Әдһәмова.

Шагыйрьнең 140 еллыгына Татарстан Язучылар берлеге тарафыннан борынгы заманнардан алып безнең көннәргә кадәрге татар шигърияте антологиясен әзерлиләр. Соңгы мондый басма 35 ел элек чыккан булган.

Моннан тыш, Язучылар берлеге тарафыннан Идел буе халыклары телләрендә утыз әсәрне үз эченә алган җыентык әзерләнгән.

Юбилей уңаеннан көтеләчәк чаралар белән дә таныштырды спикер. 15 апрель көнне шагыйрьне искә алу көне булачак. Программада чәчәкләр салу, Милли музейда «Тукай эзләре буенча» күргәзмә ачу планлаштырыла. 24-26 апрель көннәрендә “Татарча диктант” акциясе узачак. 26 апрельдә "Мин татарча сөйләшәм" акциясе үтәр дип көтелә. Программада татар теле турында лекцияләр, «Печән базары» дизайнерлар маркеты, интерактив мәйданчыклар һәм күргәзмәләр оештыру каралган.

Бөтендөнья татар конгрессының башкарма комитеты 24-26 апрель көннәрендә “Туган тел” бөтенроссия форумы оештыра. Шулай ук конгресс «Без Тукайлы халык» халыкара шигъри конкурсын, Габдулла Тукай исемендәге Кубокка милли уеннар һәм район чаралары циклын үткәрә.

Чыгыштан соң спикерны тәнкыйтьләп тә алдылар. Татарстан Дәүләт Советында «КПРФ» фракциясе җитәкчесе Хафиз Миргалимов докладчының күрсәтмә слайдындагы хаталарны күреп алып, нишләп сез чыгышыгызга шулай игътибарсыз дип тәнкыйтьләде. Татарча бер сүз әйтмәвенә дә шелтә белдерде. “Шундый зур чаралар әзерлисез. Тукай турында ник бер сүз татарча әйтелсен”, – диде ул. Аның сүзен Дәүләт Советы депутаты Азат Хамаев та хуплады. “Слайдларны татар телендә дә күрсәтергә була иде. Шундый зур чарага карата хөрмәтсезлек”, – диде ул.

Ркаил Зәйдулла «Туган тел» шигыренә һәйкәл язмышы белән кызыксынды. Һәйкәлне юбилей чараларына әзерләргә өлгермәячәкләре ачыкланды.