Царевода Питрәч районының иң зур балалар бакчасы ачылды

Сәфәр кысаларында парламент башлыгы райондагы иң зур мәктәпкәчә балалар учреждениесе - «Царево утары» торак комплексында «Йолдызчыклар» балалар бакчасын ачу тантанасында катнашты. Өстәмә урыннарны исәпкә алып, балалар бакчасы ике яшьтән алып 510 сабыйны кабул итә алачак. 

Фәрит Мөхәммәтшин педагогларны, ата-аналарны һәм балаларны өй туе, яңа балалар бакчасы ачылу белән котлады. «Балалар сәламәт һәм бәхетле, илебезнең лаеклы гражданнары булып үссен», - дип теләде парламент җитәкчесе. 

Балалар бакчасы ачылу – Царево халкы өчен күптән көтелгән вакыйга.  Торак комплекста актив төзелеш дәвам итә, биредә кечкенә балалары булган яшь гаиләләр күп.

Яңа объект – әлеге торак комплекста өченче муниципаль мәктәпкәчә белем бирү учреждениесе. Ике катлы бинаның гомуми мәйданы, техник этажны да кертеп  – 5724,6 кв. м. Биредә уен һәм йокы бүлмәләре, музыка һәм спорт заллары, медицина кабинетлары, азык-төлек блогы һәм хезмәт бүлмәләре урнашкан. Балалар бакчасы барлык кирәкле җиһазлар белән җиһазландырылган, шулай ук мөмкинлекләре чикләнгән балаларны йөртү өчен лифт бар. Бүгенге көндә балалар бакчасында 18 төркем эшли, шул исәптән берсе – сәламәтлек мөмкинлекләре чикләнгән балалар өчен. Ике төркем кечкенә яшьтәге (2-3 яшь)  сабыйлар өчен оештырылган. 

Балалар бакчасы бер ел эчендә (төзелеш 2024 елның гыйнварында башланган) республика программасы кысаларында төзелгән, смета бәясе 632 млн сумнан артык тәшкил иткән.

Балалар бакчасының исемен  – «Йолдызчыклар»ны  анда яшәүчеләр  социаль челтәрләрдә район администрациясенең рәсми төркемендә тавыш бирү юлы белән сайлаган.

Соңгы 6 елда Питрәч районында 8 яңа мәгариф учреждениесе, шул исәптән 6 балалар бакчасы төзелгән.