Олимпиада җиңүчеләре билгеле

Нәтиҗәләргә килгәндә, лаеклы беренче урынны татар телен туган тел буларак өйрәнүче Ранил Хафизов һәм Яна Уэтова яулады. Икенче урынны Азалия Зәйнәгиева һәм Михаил Кириллов үзара бүлде. Өченче урынны Зөһрә Галиуллина һәм Вадим Борисов алдылар. Искәртеп үтәбез: һәр категориядә олимпиада җиңүчесе 50 000 сум, икенче урын 40 000 сум һәм өченче урынлылар 30 000 сум күләмендә акчалата призга ия булды. Номинацияләр арасында җиңүчеләр итеп, «Сөйләүченең осталыгы өчен» Айзилә Галиева, «Татар әдәбиятына зур кызыксыну өчен» Илюзә Гайниева, «Экспрессив тел чараларын оста кулланган өчен» Илюза Вәлиуллина, «Темага фәлсәфи яктан якын килү өчен» Альмир Солтанов, «Татар телендә профессиональ лексиканы белгән өчен» Алия Сафиуллина табылды.

Бүләкләү тантанасына махсус кунаклар ТР Дәүләт Советының бюджет, салымнар һәм финанс комитеты рәисе урынбасары Камил Әсхәт улы Ногаев, ТР Мәгариф һәм фән министры урынбасары Минзәлия Заһри кызы Закирова килде. Алар барлык катнашучыларны котлады һәм алга таба да студентларга уңышлар теләделәр. 

Ә без җиңүче Ранил Хафизовны әлеге уңышы белән котлап, аның уй-фикерләрен белештек. 
— Бу олимпиада турында каян белдең?
—Миңа ул хакта укытучым әйтте. Үзем бик теләп, һәрвакыт олимпиадаларда, татар теле булган чараларда катнашырга тырышам
— Акчалата бүләкне нәрсәгә тотарга уйлыйсың?
—Бу хакта әлегә уйламаган идем. Минем өчен иң мөһиме ул — катнашу үзе иде.
— Үзеңә нинди максат куйдың: татар телен белу дәрәҗәсен исбатлау, проектыңны таныту яисә башкалармы?
— Үземнең татар телен ни дәрәҗәдә белүемне күрсәтәсәм килде.

Олимпиада татар теле һәм әдәбиятын өйрәнүдәге яңачыл чара булып та, безнең яшьләрнең телне һәм әдәби мирасны нинди осталык белән үзләштерүләрен күрсәтте. Бәйге яшьләргә үз осталыкларын күрсәтергә, бәяләнергә һәм киләчәктә дә татар теле белән актив эшләвен дәвам итәргә мотивация бирде. Оештыручыларга, катнашучыларга һәм җиңүчеләргә зур рәхмәт! Сезнең башкарган эш безнең милли-мәдәни байлыгыбызны саклау һәм тапшыру юлында бик мөһим. Олимпиадалар алдагы елларда да дәвам итсен дип телибез!

Алинә Фәхретдинова