«Салават күпере» — балалар бакчалары өчен заманча методик әсбап

«Салават күпере» журналы редакциясе җитәкчесе 3иннур Хөснетдинов билгеләп узганча, 90нчы елларда бакчаларда балаларны укыту, аларга дәресләр бирү, алар белән төрле уеннар уйнау өчен тәрбияченең кулында бернинди ярдәмлек әсбаплар булмый. Һәм шуны исәпкә алып, «Салават күпере»нең беренче саныннан ук шундый материаллар, шундый әсәрләр, шундый ярдәмлекләр бирелә башлый.

- Ул вакыттагы тәрбиячеләр ничек эшләгәндер, нинди дәреслекләр белән, нинди ярдәмлекләр белән эш иткәндер... Мин бүгенге көндә сезнең кулыгызда нинди укыту әсбаплары, ярдәмлекләр барлыгын төгәл генә әйтә алмыйм. Һәм бүген дә хәлләр әйбәттер дип уйламыйм әле, чөнки татар телендә ярдәмлекне нәшер итү өчен, аны раслау өчен бик күп бюрократик юллар узарга кирәк, - ди 3иннур Хөснетдинов.

36ел элек «Салават күпере»нең кояш кебек балкып торган, затлы кәгазьдә, затлы буяулар белән дөньяга чыгуы зур бәйрәм була. Басманы ул чакта да тәрбиячеләргә методик әсбап итү максаты куелса, бүген дә ул шушы максатка тугры булып кала.

-  Моңа кадәр басма журналның һәрбер почмагы бу кадәр киң, бу кадәр мультиформатлы һәм шундый күп мөмкинлекле булганыюк иде. Менә хәзер без шушы QR-кодлар ярдәмендә басма журналны чын мультиформатлы мәйданга әйләндерә алдык. Һәм безнең «Татмедиа» басмалары арасында нәкъ менә балалар басмалары — «Салават күпере», «Сабантуй» журналы бу технологияне беренчеләрдән булып кертеп җибәрде, - ди «Татмедиа» АҖ медиадиректоры Алсу Исмәгыйлева.

Аның сүзләренчә, балалар белән эшләүче басмалар хәзерге вакытта иң прогрессив булып санала. Әгәр дә бүген шушы журналларны мәктәпкәчә белем учреждениеләрендә кулланалар икән, димәк, бу чыннан да файдалы һәм кирәкле эш, һәм бу эшне дәвам иттерергә кирәк, дип ассызыклый ул

Сүз уңаеннан, узган елның апрелендә журналны мәктәпкәчә яшьтәге балалар белән эшләүдә куллануның иң яхшы методикаларын ачыклау һәм тарату максатыннан “Уеннар сандыгы” дигән конкурс та игълан ителгән. Конкурс шартлары буенча балалар бакчалары тәрбиячеләре үзләренең «Салават күпере» журналын ничек кулланулары турында  видеоматериаллар тәкъдим итәргә тиеш булган.

Конкурска республиканың төрле почмакларыннан 50 эш кабул ителгән. «Салават күпере» һәм «Сабантуй» балалар басмалары вәкилләре гаризаларны җентекләп өйрәнеп, иң кызыклы һәм нәтиҗәле 14 тәҗрибәне сайлап алган. Фикер алышудан соң җиңүчеләрне бүләкләү тантанасы узды.

Билгеле булганча, Татарстанда «Яшьләр һәм балалар» илкүләм проекты гамәлгә ашырыла.