«Телефоннарын да оныттылар»: Биектауда «Ура, авылга!» проекты балаларны татар мәдәниятенә якынайтты

Биектау районында узган «Ура, авылга!» проекты җәйге ялны күңелле генә түгел, ә милли рухлы һәм файдалы итеп үткәрергә мөмкин икәнен күрсәтте. Проект төрле милләт балаларын берләштереп, татар теленә һәм мәдәниятенә кызыксыну уятты.

Быел «Ура, авылга!» проекты өченче тапкыр үткәрелә. Ул «Алдынгылар хәрәкәте» һәм Татарстан Рәисе каршындагы татар телен һәм республикада яшәүче халыкларның телләрен саклау һәм үстерү комиссиясе ярдәме белән гамәлгә ашырыла.

Биектау районында проект Дөбъяз, Әлдермеш һәм Мәмдәл авылларын берләштерде. Биредә 200 бала ял итте. Алар арасында татар авылларыннан да, рус авылларыннан да килгән малайлар һәм кызлар бар иде. Татар телен бөтенләй белмәгән балалар да берничә көн эчендә яңа сүзләр өйрәнде, татарча җырларга кушылды һәм милли уеннарда рәхәтләнеп катнашты.

Милли мәдәният – кызыклы ачыш

Проектның һәр көне балалар өчен яңа тәэсирләр алып килде. Алар милли бизәкләр белән брошьлар ясады, кыстыбый пешерде, татар халык музыка кораллары белән танышты, милли уеннар уйнады. Аеруча көрәш буенча остаханә балаларда зур кызыксыну уятты. Шулай ук алар авыл тарихы белән танышты, «Сәхтиян» читек фабрикасында булып, милли аяк киеменең ничек тегелүен үз күзләре белән күрде.

«Балалар татар телен уен аша үзләштерә»

Оештыручылар әйтүенчә, балаларның татар мәдәниятенә мөнәсәбәте бик тиз үзгәрә. Дөбъяз балалар сәнгать мәктәбе директоры сүзләренә караганда, хәтта берничә көн дә моның өчен җитә.

– Балалар бездән үрнәк ала, яңа сүзләрне кызыксынып кабатлый. Безгә хәтта рус авылларыннан Пановкадан да балалар килде. Алар белән эшләү җиңел: иң мөһиме барысын да елмаеп, уен аша аңлату. Шунда балалар татар телен дә, мәдәниятен дә кызыксынып кабул итә башлый. Алар өчен бу – кызыклы ачыш, – ди ул.

«Телефоннарын да оныттылар»

Проект яшь әйдаманнар өчен дә зур тәҗрибә мәктәбенә әверелгән.

Биектау сменасында эшләгән көллият студенты әйтүенчә, иң кадерле мизгелләрнең берсе балаларның күз алдында үзгәрүен күрү.

– Бу проект миңа зур тәҗрибә бирде. Әмма иң мөһиме – балаларны милли мәдәният белән кызыксындыра алуыбыз. Алар сораулар бирә, татарча сүзләр өйрәнә. Иң сөендергәне – кайчак хәтта телефоннарын да онытып торалар. Димәк, аларга чынлап та кызык, – ди ул.

Сабантуй белән тәмамланган смена

Проект зур Сабантуй бәйрәме белән төгәлләнде. Балалар милли уеннарда көч сынашты, җырлады, биеде һәм смена дәвамында өйрәнгәннәрен күрсәтте.

«Ура, авылга!» проекты җәйге лагерь гына түгел. Ул төрле милләт балаларын берләштерә, татар теленә һәм милли мәдәнияткә кызыксыну уята, яшь буында милли традицияләргә хөрмәт тәрбияли. Иң мөһиме татар мәдәниятенең бүген дә заманча, кызыклы һәм балалар өчен якын булуын тагын бер кат исбатлый.

Айзилә Гатауллина