Артур Исламов: ««Безнең җыр» катнашучыларын шоу-биз вәкилләре белән чагыштырырга кирәкми»

Традиция буенча, шагыйрьләр, композиторлар һәм җырчылар берләшеп язылган яңа җырлар зур сәхнәгә менәчәк. Быел исә көтелмәгән коллаборацияләр һәм яңалыклар булачак дип, вәгъдә итте проектның оештыручылары.

Лабораториягә сезон саен яңа иҗатчылар өстәлеп тора. Иң мөһиме – аларның үз өлкәләрендә профессионал булуы һәм үз эшләре белән януы.

– Без бу проектка гонорар, дип килмибез. Ә чын мәгънәсендә, татар җырын яңа дәрәҗәгә күтәрү өчен, фикердәшләр белән берләшеп, матур иҗади процесс булдыру өчен киләбез. Филармониядә яңгыраячак җырларны поп-музыка, ә башкаручыларын шоу-биз вәкилләре белән чагыштырырга кирәкми. «Безнең җыр» җырчылары алар, шоуменнардан аермалы буларак, үз проектларын эшләп, концертлар, турлар куеп йөрүчеләр түгел. Әйе, алар да профессионаллар – консерватория укытучылары, филармония артистлары, – дип билгеләде лабораториянең тәҗрибәле катнашучысы, җырчы Артур Исламов.

Концертта 21 җыр яңгыраячак. Алар Тинчурин театрының Ильяс Камал җитәкчелегендәге оркестры белән башкарылачак. Чакырылган кунаклар арасында Миләүшә Тәминдарова җитәкчелегендәге Татарстан дәүләт камера хоры да бар.

– Кичә кызыклы форматта узачак. Тулаем җанлы профессиональ музыка. «Калеб»нең унъеллык тарихы эчендә безнең үзебезнең аудиториябез дә үсеп җитте, яңа тамашачыларны да җәлеп итәргә тырышабыз. Шулай да, беркемне дә көчләп китермибез. Бары тик, чыннан да, кызыксынган, зәвыклы, интеллектуаль тыңлаучыларны көтәбез, – дип искәртеп узды Казан шәһәре башкарма комитеты җитәкчесе һәм проектның чишмә башында торучы Гүзәл Сәгыйтова.

Артистлар арасында – Эльмира Калимуллина, Алинә Шәрипҗанова, Илгиз Шайхразиев, Илгиз Мөхетдинов, Азат һәм Алинә Каримовлар һ.б. Җырлар тудыруга кулларын тидергән композиторлар һәм шагыйрьләр исемлеге дә шактый киң.

Яңа туган җырлар тамашачы күңеленә хуш килерме? Популяр булып китә алырмы? Барысын да вакыт узгач белербез. Чөнки һәрбер иҗатчының һичшиксез үз тамашачысы.

Алсу Мансурова
Фото