Чәчкәнең гайбәткә үз җавабы...

- Лилия, ни өчен Чәчкә исеме белән чыгыш ясыйсың? Үзеңне берәр чәчәк белән тиңлисеңме?
- Юк, үземне бернинди дә чәчәк белән тиңләмим. Рөстәм Сәрвәров белән танышкач, ул миңа: «Татар эстрадасында Лилия исемле җырчылар күп - тәхәллүс кирәк», - дип әйтте. Һәм иң беренче сәхнәдә җырлаган җырым да «Чәчкә» дип аталган иде, шуннан да калгандыр (көлә).
- Шоу-бизнеска ничек килеп эләктең?
- Беренче чыгышларым Лениногорск шәһәрендә училищеда укыганда булды. Студентлар тормышында бик актив катнаша идем. Ә Казанга килгәч, Рөстәм абый белән танышып, сәхнәгә мендем. Бер җырлый башлагач, кире туган җиремә кайтасы да килмәде - сәхнәнең тәмен тойдым.
- Җырчы булыр өчен теләк белән талант кирәкме, әллә моңа тагын да күбрәк сыйфатлар өстәлергә тиешме?
- Иң элек үз-үзеңә сорау бирергә кирәк. Үзеңнең тормышыңны сәхнә белән бәйлисең киләме? Сәхнә тормышы теливизордан караганнан бик аерыла. Ә инде чыннан да артист булам дигән кеше иң беренче үзе булып калырга тиеш. Һәм, әлбәттә, монда теләкнең дә зур өлеше бар.
- Лилия, үзең өчен кумир итеп кемне куясың? Бүгенге сәхнәдә үрнәк алырлык җырчылар бармы?
- Рус эстрадасыннан Лолита Милявская, София Ротару иҗаты ошый, ә инде татар эстрадасына килгәндә, Хәмдүнә Тимергалиеваны үрнәк итеп куярга була. Аның бигрәк тә чын кеше буларак, туры сүзле булуы; тормыштагы Хәмдүнә апа белән, сәхнәдәге Хәмдүнә апа аерылмавы бик тә ошый.
- Үзең күбрәк нинди җырлар җырларга яратасың?
- Татар халык җырларын җырларга яратам. Чөнки алар халыкчан, моңлы, йөрәккә үтеп керә торган җырлар. Дискәтүкләрдә җырланыла торган җырларым да бар, аларны да яратып, теләп башкарам.
- Сезнең белән Наил Табанаков турында имеш-мимешләр күп йөри, аларга ышаныргамы?
- Ышанганы ышана инде аның. Мин кеше тормышына кермим, бүтәннәр дә кермәсеннәр иде.
- Ни өчен хәзер бергә җырламыйсыз?
- Мин хәзер яңа коллектив белән эшлим, яңа тормыш башладым.
- Хәзер син бер баянчы белән бергә иҗат итәсең, аның белән таныштырып китсәң иде?
- Ул Азнакай егете. Рүзил Вәлиев исемле. Бик талантлы егет, җырлар яза, пародияләр остасы, шулай ук туйлар да алып бара. Аннан кала без бию коллективлары белән бергә дә эшлибез.