Кәрим Тинчурин театры 91нче сезоның өченче премьерасын тәкъдим итә

18-19 декабрьдә К.Тинчурин исемендәге Татар дәүләт драма һәм комедия театры “Хыялга бер адым” бер сәфәр тарихы премьерасын яраткан тамашачысына күрсәтәчәк. Искәртеп узарга кирәк, әлеге пьеса прозаик Рөстәм Галиуллин тарафыннан, Кәрим Тинчуринның хатыны, “Сәйяр” труппасы актрисасы Заһидә Тинчурина истәлекләренә нигезләнеп, Тинчурин театры өчен махсус язылган.

“Кәрим Тинчурин исемен йөртәбез икән, безнең репертуарда аның турындагы төрле форматтагы  сәхнә әсәрләре булырга тиеш”, –диде театр директоры Фәнис Мөсәгыйтов.  Кәрим Тинчурин ролендә  исә Артем  Пискуновны күрәчәкбез.  

“Без барытик язмалар, белешмәләр аша гына К. Тинчуринның холкы, аның нинди кеше булуы хакында нәрсәдер әйтә алабыз. Кулга алынгач та, ул куркыныч авырлыклар вакытында беркемне дә “сатмый”, ялган сөйләми. Бу исә аның гадел, дөрес кеше булын күрсәтә, дип уйлыйм”, - ди Артем.

Артист шулай ук Кәрим Тинчуринның зур труппа белән оста итеп идарә итә алуын да ассызыклый, аның белән гаҗәпләнүен белдерә: “Артистлар – үзенчәлекле халык. Төрлесе була: минминлелеклесе, театрда үзен йолдыз дип санап йөрүчеләре... Драматург исә 60 артистны үз артыннан ияртә алган! Нәтиҗәдә, Кәрим Тинчуринны җаваплы, максатчан һәм хәтта хыялый кеше булган дип әйтә алабыз.”

К.Тинчурин театрының баш режиссеры Туфан Имаметдинов исә спектакльнең төп үзенчәлеген билгеләп узды: “Спектакльдә илебез һәм милләтебез өчен катлаулы булган 1921 нче ел сурәтләнә. Ул чорның безнең хәзерге вакыт белән дә ниндидер тәңгәллеге бар, минемчә. Моннан 100 ел элек шул заман актерлары татар театрын саклап калырга тели, аны яшәтер өчен төрле юллар эзли. Шунысы мөһим, постановка Кәрим Тинчурин һәм аның тормыш иптәше Заһидә Тинчурина шәхесләре генә түгел, ә, гомумән алганда, аның белән бергә эшләгән, иҗат иткән актерлар турында да. Шушы спектакль аркылы аларның барысын да күрсәтү теләге бар иде.

Постановка татар театрының чишмә башын тасвирлый. Һәм моны Тинчурин актерлары Кәрим Тинчурин исемен йөрткән театр сәхнәсендә күрсәтә!