Сәйдә Мөхәммәтҗанова: "Минем өчен иң мөһиме - татар халык җырын яңгырату иде"

Чыннан да, "Голос" та "Су буйлап" дигән җырны яңгырату идеясе каян килгән соң?
Сәйдә анда катнашу өчен башта татар җырыннан кала, өч русча җыр әзерләп бара. Әлеге музыкаль тапшыруның мөхәррирләре аннан: "Синең репертуарыңда берәр күңелле җыр бармы?" - дип сорыйлар. Әмма Сәйдә андый җыры юклыгын әйтеп, аларга узган ел "Созвездие - Йолдызлык" та Гран-при алган татар халык җыры "Су буйлап"ны башкарып күрсәтә. Шул җырны проектта катнашу өчен сайлап та алалар.

Сәйдә үзенең "Голос" та катнашуы хакында болай дип сөйли:
- Мин сәхнәгә чыкканда бик дулкынландым. Анда оркестрга кушылып җырладым. Пелагея белән Дима Билан миңа таба борылгач кына каушауларым юкка чыкты. Шул мизгелләрдә ничек сөенгәнемне аңлатырлык түгел. Аннары үзем Пелагеяны сайладым, чөнки ул минем рухыма туры килә. Үзе дә халык җырларын башкара. Гомумән, аның иҗаты миңа бик ошый. Ул шат күңелле, аралашучан. Мин биредә катнашып финалга үтүне максат итеп куймадым. Минем өчен иң мөһиме - татар халык җырын яңгырату иде. Аның каравы, мин "Су буйлап" ны илебездәге бөтен милләттәшләргә ирештердем.

Тамашачылар арасында Сәйдәгә багышлап шигырь юллары язучылар да шактый.
Калын толым, кара күзең
Сихерләде бит Сәйдә.
Татар моңын бар җиһанга
Тарат, чибәр кыз, әйдә!

^{Фото kp.ru сайтыннан алынды}