Ни өчен М.Гафури театры директоры Фидан Гафаровның башка театрга баруына каршы?

Сүз дә юк, казанлылар М.Гафури театрының атаклы артисты Фидан Гафаровны түземсезлек белән көтеп ала. Ул да, үз чиратында, Казан гастрольләренә сөенеп килүен әйтте. “Башкорт дәүләт академия драма театрында 55 ел эшлим һәм 50 елдан артык Казанга гастрольләр белән киләм. Бүгенге тамашачы яшь буенча үзгәрде, кайберләре инде юк. Әмма татар һәм башкорт сәнгатен ярату, сөю, кадерләү бервакытта да үзгәрми”, - диде журналистлар белән узган очрашуда Башкорстанның халык артисты Фидан Гафаров. 

Театр директоры Иршат Фәйзуллин Фидан Гафаровны хөрмәт итүе турында сөйләде. “Мондый дәрәҗәдәге артист белән эшләү бик җаваплы. Бервакыт Фидан абый “Нур” Татар дәүләт театры белән килешү төзергә уйлаган иде. Ләкин мин каршы килдем, чөнки Фидан Гафаровның язмышы безнең театр белән бәйләнгән. Ул – театрыбызның бренды”, - диде Иршат Фәйзуллин.

Фидан Гафаров исә Г.Камал театрының баш режиссеры Фәрит Бикчәнтәевның М.Гафури театрында тагын бер спектакль куюын үтенде. Моңа кадәр Фәрит әфәнде Башкорстанда 3 спектакль куйган булган. “Фәрит һәр персонажны тоя белә”, - ди Фидан абый. Театрның башка артистлары да бу фикерне хуплады. “Төрле режиссерлар белән эшләү артист өчен мөһим. Үсәргә этәргеч бирә”, - ди театр актеры Алмас Әмиров. Фәрит Бикчәнтәев бу тәкъдим турында уйларга вәгъдә бирде.

М.Гафури театрының Казандагы гастрольләре 13-17 апрельдә Г.Камал исемендәге Татар дәүләт академия театры бинасында узачак.  

Эльвира ШАКИРОВА