Президент Тукай исемендәге бүләк тапшырды

Шәһәр көнендә Г. Камал исемендәге Татар дәүләт академия театры бинасы каршында Президент Рөстәм Миңнеханов быелгы Г. Тукай исемендәге республика бүләген тапшырды. Аңа «Кол Шәриф» мәчете архитектура комплексын эшләгән иҗат коллективы - Зөфәр Галиуллин, Андрей Головин, Айвар Саттаров, Искәндәр Сәйфуллин, Альбина Дәишева, Рөстәм Зәбиров, Зөфәр Садыйков һәм Сергей Шәкүров лаек булды. Президент, аларга мөрәҗәгать итеп: «Сез «Кол Шәриф» мәчетендә республиканың һәм халкыбызның бөтен матурлыгын туплый алдыгыз. Сез - сәләтлеләр һәм мәчетебез горурлыгы», - диде.
Тантанада шулай ук Дәүләт Киңәшчесе Минтимер Шәймиев, Дәүләт Советы Рәисе Фәрит Мөхәммәтшин һәм шәһәр мэры Илсур Метшин да катнашты.