“Тәртип” талантлы яшьләрне халыкка күрсәтә

Радионың баш мөхәррире Ризәлә Исмәгыйлева билгеләп узганча, үткән белән көткән арасында күпер салучы булып торган радионың бер максаты – талантлы яшьләргә мәйдан бирү. 
– Концертта катнашучыларның исемнәре билгеле булмаса да, алар бик талантлы һәм безнең бу яшьләрне халыкка күрсәтәсебез килде. Шөкер, үткәндәге яхшыны киләчәккә алып барып тоташтыра торган өметле яшьләребез бар, – диде ул матбугат очрашуында.  
"Тәртип” радиосының “Калеб” тапшыруы яшь иҗатчылар белән таныштырып бара. Аның алып баручысы Миләүшә Ризванова сүзләренчә,  алар белән 126 тапшыру эшләнгән. Эфирга 120 егет-кыз килеп киткән.   
– Катнашучыларның географиясе бик зур. Арча, Саба, Лениногорск, Теләче һәм башка районнардан киләчәкләр. Хәтта Башкортстаннан да килүчеләр бар, алар –  Илнар Шәрәфетдинов, Руслан Габбасов. Әлеге яшьләрнең һәрберсе белән аерым концерт та оештырып булыр иде, – диде ул
Концертта Муса Җәлил шигыренә төшерелгән клип премьерасын да күреп булачак. 
– Кариев театрында эшләгән вакытта “Муса. Моабит” спектакленә композитор Миләүшә Хәйруллина берничә җыр язган иде: “Төрмәдә төш”, “Яулык” һәм Муса Җәлилнең әнисе язган “Бишек җыры”. “Төрмәдә төш” дигән җырга клип төшерелде һәм аның премьерасы концертта тәкъдим теләчәк, – диде Миләүшә Ризванова.