Туфан турында уртаклашыр хатирәләр күп

Аны заманында үзе төзеткән 12 нче гимназия укучысы Мәдинә Латыйпова Туфан абыйга багышланган шигырь белән ачып җибәрде.

Дәүләт Советы рәисе урынбасары Римма Ратникова Туфан Миңнуллинны юксынуып яшермәде. "Парламентка Туфан абыйлар кирәк. Ул туган ягы кешеләренә ярдәмчел булды. Татар теле, мәдәнияте, гади халык тормыш - көнкүреше дә сыйды аның йөрәгенә. Ул туры сүзен җиткерә белде. Милли сәясәткә юл салды", - диде ул.

Дәүләт Советының Фән, мәдәният, мәгариф һәм милли мәсьәләләр комитеты рәисе Разил Вәлиев Туфан Миңнуллин белән 45 ел буе аралашып яшәгәнлектән, уртаклашыр хатирәләре дә күп. "Миңа бүген Туфан җитми, гомумән ул татар халкына җитми", дип башлады ул сүзен. - Бервакыт Азнакайда Нәҗибә ханымга ат бүләк иттеләр. Шул чагында ул атны машина белән алып кайтмады. Без арбага утырып биш көн Мәрәтхуҗага кайттык. Болгарга җиткәч, Идел аша чыгып булмый. Туфан ага шунда ук баржа китертте. Без аның белән поездда Австриягә, Германиягә бардык. Ул самолетка утырмады. Финляндиягә баргач, балта, Австриядән кабак төше, Германиядән кесә сәгате алып кайтты. Аның хыялы Истанбулны барып күрү иде, әмма анысы тормышка ашмады, дип сөйләде.

Театрда гөрләп барган "Диләфрүзгә дүрт кияү" спектаклендә Җәмил ролен уйнаган Әсхәт Хисмәтов Җәмил җырын башкарды. Ә андагы дуэтны алар Зөлфирә Зарипова белән бергәләп башкардылар. Күренекле җырчы Флюра Сөләйманова кичәдә "Сибелә чәчем" җырын тикмәгә генә җырламаган икән. Үзенең 65 яшьлек юбилеенда ул Туфан абыйның: "Машинада барганда Флюра Сөләйманова "Сибелә чәчем" не җырлый башлады. Мин елап җибәрдем", дип сөйләгән сүзләрен искә төшереп алды.

Филармония директоры Кадим Нуруллин: - Мин Туфан абыйны бөтенләй белмәгәнмен. Аның "Утырып уйлар уйладым" китабын укып чыктым. Драматург ышандырып язса гына уңыш казана. Ул ихлас язучы иде", - диде.

Кичәдә Туфан Миңнуллин спектальләреннән җырлар яңгырады. Әсәрләреннән өзекләр укылды. Аларны танылган җырчылар белән бергә театр артистлары башкарды. Шагыйрә Флера Тарханова драматургка багышлап язган шигырен укыды.

^{Фотолар: Шамил Абдюшев/intertat.ru}